Singapore Film Festival Delhi nung akatsü

New Delhi, July 12, 2016 : 3buba Singapore Film Festival taruba ita India Habitat Centre nung akatsü.
August 5 nungi 7, 2016 tashi amongtsü aliba iba benjungmong ya Singapore High Commission-i Habitat Film Club den lokteper ayongba lir. Iba benjung ya Singapore nungi adokba film tajungtem sayutepba mapang ka asütsü.
“India ya technology nung kanga dang tashi tait linük ka lir aser Singapore Film Festival ajanga onok dak puratitettsü sempet aliba temai adoka sayutsü,” ta benjung sentong atonger aser Singapore High Commission nung First Secretary Kester Tay-i ashi.
“Onok linük tila süaka kanga renloka odar aser alima dang ashitsü otsü aika lir aser iba jagi India nunger dak kongshia linük ana sobaliba tsütsü tesentaktep tali akhangshitsü onoki imlar,” ta Tay-i shisem.
Iba benjungmong lapoka “7 Letters” film sayutsü. Taküm iba film ya Oscars Award nung Best Foreign Language Film atema tenüng benoka liasü. “7 Letters” film nung Singapore nung nüngtugu film director teneti yangluba otsü tatsütsü tenet lir.
Item director tenet rongnung Eric Khoo aser Boo Junfeng nata densema lir.
Tenati yangluba “The Apprentice” film taküm Cannes Film Festival mapang sayuogo.
Film sayuba sülen K. Rajagopal den sensaksem ka akatsü. Singapore nung Rajagopal-i yangluba film temji India nunger otsü dak ajemdaker timba yanglur.
“Singapore Minstrel” film August 6, 2016 nü sayutsü. Iba film ya otsüsütsüsa tsüngsanger, Roy Payamal taküm otsü nung ajemdaker yangluba lir. Roy ya Singapore nung alir India nunger lir. Ng Xi Jie-i direct asüba Singapore Minstrel film nung Roy libaliro aser pai inyakbatem kanga jangja angutsü.
Iba film sayuba sülen Payamal aser Jie na den sensak asemtsü.
Iba benjungmong ya “Utter” film sayua tembangtsü. Iba film nung animated film asem lir. Iba film ya Singapore Writers’ Festival 2015 sentong nunga sayuogo.
Film sayuba sülen, alima ajaki meteta alisang animation artist Tan Wei Keong-i Singapore animation industry aser pai purapiteta inyakba kar lemsateptsü.