Singapore, January 28 (Agencies) : India nunger Singapore lisopur kati tangar külakokja parnok atema Productivity & Innovation Credit (PIC) scheme kübok sen tera inoka yur iba nung jagi ajangzükba mapang shia agütsüba inyakyim (cash payout) yanglutsür aser iba inyakba nungi pa sen dollar 768,000 tajangzük agir ta okadaki tai tonglokja lir, ta osangbenertemi metetdaktsü.
Paradize Consultancy kibur, arishi küm 35 tain, S. Chandran ya Hokolbarnü aitsü aser Income Tax Act kübok inyakyim 58 nung aija lir, ta osangkakettem ajanga metetdaktsü.
Pai metetsümonga PIC inyakyim kübok cash payout 49 yaria yanglutsüba atema aitsü. Pai iba mapaji 2013 aser 2014 kümtem nung inyaka liasü.
Tang tashi nung PIC dak sendakba ken o tulutibaji ibai alitsü, ta kasa osang ajangasa ashi.
Chandran nem sen 200,000 (Singapore dollar) agi bail agüja lir aser ano Febuary 03, 2017 nü okadak nokdangtsü.
Chandran-i 2008 küm IT instructor mapa yutsür pai jangra aliba magic angazüktsü tenzük aser 2014 nung US nung aliba International Magicians Society ket nungi Best Variety Entertainer award anguba sülen kanga nüngtugu aküm.
Yaküm küm PIC nung temulung malemtsüsa inyakteta aliba maparen kanga telungi ia bushisüngdangba mapang Chandran-a ochi mashi inyakyim aika nung sendaktepa aliba putet, ta Inland Revenue Authority of Singapore (Iras) sangdong ka ajanga metetdaktsü.
Iras nung tax prosecutor Elisa Soh Hui-i ashiba agi, Chandran-i PIC atema inyaker ta tiyazü shia tangar dang nungi sen 400,000 (Singapore Dollar) jiluzüka agiogo.
PIC scheme ya shitakbabu takoktet shishilembartem atema lir.
Chandran iba ken o nung ai nungbo pa dang Singapore dollars, sen 50,000 tashi senchi achitsü mesüra küm pungu tepuokdak ayutsü.
You must be logged in to post a comment Login