Singhal-i jembibaji oji Centre tashi mietdaktsütsü asoshi lir: Azam

Rampur (UP), July 20 (Agencies): Tawa VHP patron Ashok Singhal-i 2020 küm tashi nungbo India linük ya ‘Hindu Linük’ ka akümtsü ta jembiba o nung ajemdaker yasüng Samajwadi Party lenir, Azam Khan-i, VHP patron-i jembiba oji BJP sorkar tashi mietdaktsütsü asoshi lir, aser parnoki (BJP) pai jembiba oji au ta mali, ta ashi.

Yasüng Rampur nung osangbenertem den jembiba mapang Uttar Pradesh nung Urban Development & Parliamentary Affairs minister Khan-i, VHP lenir tainji temang anema mali aser sorkar nung alir shingaia pai jembibaji oji au ta mali, ta ashi.

“Pa (Singhal) shisatsü minpronga lir, kechiyong Modi (Ato kilonser)-i pa dang, Ram tekülem ki yanglutsü asoshi alima ajunga nungi sen crore aika tentet (VHP) dangi tenla aruba indang osang tejangja agüjang ta shiogo,” ta Khan-i ashi.

Honibar nü Vishwa Hindu Parishad (VHP) lenir Singhal-i, “Ni Sai Baba Ashram nung aliba mapang Sai Baba-i kü dang, 2020 küm tashi nungbo linük rangben ya Hindu akümtsü aser 2030 küm tashi nungbo alima ajak ya Hindu asütsü ta ashi. Iba yimsoshiba ya tenzükogo ta ni bilemer,” ta jembia liasü.

Singhal-i, 2014 Lok Sabha election nung BJP-i aniba teloktep party temi takok tulu anguba ya linük nung yimsoshiba ka lir aser 2020 küm tashi nungbo India ya Hindu linük ka akümtsü, ta jembia liasü.

Iba sangdong dak sentakba nung Minister Azam-i, “Hindu Rashtra ka tentetba jembidang Singhal-i Sai Baba tenüng tetshiogo. Ajisüaka iba mapang nungji tamang lenir-i jembiba oji ajanga Sadhu tem jashi aser pa indang kürakyanglutema raksatsü,” ta ashi.

Rashtriya Swayamsevak Sangh (RSS) dak sentakba nung Singhal-i, Linük Temzüng nung Jammu & Kahsmir nem maongka balaka agütsüba Arrla 370 agientsü akhangba mapang nungi tenzüka iba tentet ya melenshidagi, ta jembia liasü.

“Atal Bihari Vajpayee-i sorkar tashi bena ali asübo Kashmir tebilemtsü ya benteter alitsü asü ta parnoki bilemer,” ta Khan-isa ashi.