Sinus anepaluyim

Teni, tenük aser tenipong lunga aliba teret ya nep adokdaktsüba ‘membrane’ tem den sendaktepa lir aser ibaji ajanga asenoki saketba mopung talem kümdaktsüba den tzü keta kümdaktsür. Aji dang masü saka mesena temang telungi maitdaktsüi nokdanger. Kodang nep junga mao tali atsüngtena kümdir mesen agi sünga akümer aser ibaji ajanga sinus tenzükdaktsür.
Sinus agi kangshiba mapang antibiotics, steroids aser anti-inflammatory mozü tem agir saka karbo surgery-a agitsüsa akümer. Mozü agiaka mamatsü, cheese, ice cream, aser mamtsü agi yangluba chiyungtsütem achiba manenra kecha teyari magütsütsü.
Kidang sinus anepalutsü temetetsü kar yamai:-
1. Chiyungtsü achiyim (Diet):Sinus ashidang chiyungtsü tali tapong machitsüla. Antsü, chocolate, totzü nung aruba chiyutsü, shini, talangka ayuba chiyutsütem aser mamatsü agi yangluba chiyungtsütem ajanga nep kanga mela kümdaktsür anungji sinua aketertemi item chiyungtsü machitsüla. Tzü tajung aser temerük den soup peria ajemtsüla.
2. Herbs:Soup aser chiyungtsü ajak nung lasüng, cayenne pepper aser horseradish enoker chia ajemba ajanga nep yimsadaktsür aser temang nungi odaktsüba nung yarir.
3. Tzü amshiba mori (Neti pot):Tzüyim tzü spoon ka tzü marok ana nung aisa ang aser tzü amshiba mori nung marok ka enokang. Iba sülen tsü intokba tesem nung tekolak mangar iba tzüji teni nung enoka teni külen nungi yima aludakjang. Teni nung iba tzü enokdang tekolak tesüleni memangatsüla. Kasaji teni külenjia inyakang.
4. Apple cider vinegar:Sinus ashitsü amai asüdang yongi tzü 250gm nung apple cider vinegar spoon ka mesüra ana den ninang mochitsü spoon ka enoka ai’er anogo nung asemben anogo pongu nü ajemtsüla. Apple cider vinegar yagi nep yimsadaktsür aser melamela temang nungi odaktsür.
5. Tsükmenatsü jang nungi agizükba tzü (Grapefruit seed extract) (GSE): Tsükmenatsü tejang nungi agizüba tzü ya ‘natural antibiotic’ tashi tait ka mesüka lir aser mesen tapu 30 dak tema kanga junga nokdaker. Anungji sinus agi titemertemi GSE alia teni nung kahokba ajanga anisüngzük angutsü..