Sir Mick Jagger’er tanur 8 kümogo

December 09, 2016 : Rolling Stones kentener telok nung kentensang, Sir Mick Jagger arishi küm 73 nung tanur 8 buba tebu kümogo, ta pa otongdari sangdong ka ajanga metetdaktsü.
Kentensang, Mick’er tanur tenet tashi lir aser par tanurtem arishi küm 17 nungi 45 tashi nung lir. 2014 küm par semchir tanabubaa aruogo.
Pa tetong America tsür ballet tsüngsanger, arishi küm 29 tain, Melanie Hamrick-i Brihostibarnü New York nung tebur chanu ka aso, ta Mick Jagger atema otangdar Bernard Doherty-i ashi.
Sangdong ka ajanga ashiba agi, Hamrick aser Sir Mick naprong tanur asodang kanga pelatep. Tanur asotsü mapang Mick-a mozü kidang ata liasü.
“Tetsü aser tanur naprong kanga junga lir aser tang kanga petepba mapang osangbenertemi kanga osüngola mesüi onok süngjema yutsü nung ajungtsü,” ta kasa sangdong ajangasa ashi.
Sir Mick aser Hamrick na ya küm 13 tashi pa den medema aliba L’Wren Scott, 2014 küm soseta asüba sülen nungi medema aru.
Nüngtugu kentener Mick’er tanurtem indang tetsütemji Marsha Hunt, Bianca Jagger, Jerry Hall aser Luciana Gimenez Morad nunger lir.
Pa semchir pungu (5) lir aser 2014 May ita nung tanabuba semchir aru. Mick’er semchir aser Jade Jagger’er jala Assisi-i pa nem mezüng tanabuba semchir sotsü.
Rolling Stones teloki tawa ang blues ken indang kensep ‘Blue & Lonesome’ sayaogo.