Sir Ridley Scott nem BAFTA Fellowship agütsütsü

Tsüklai 01, 2018 (Agencies): Taküm British Academy of Film & Television Award (BAFTA) nung Sir Ridley Scott nem BAFTA Fellowship sempet agütsütsü.
Arishi küm 80 tain film yanglur Scott ya film yanglu tenzüker küm 40 dak tali jungogo aser pai feature film 25 yanglua lir aser item rongnung ‘Alien’, ‘Gladiator’, ‘Thelma and Louise’ aser ‘Blade Runner’ film tem densema yanglua lir.
“Film yangluba nung kü wadang yangluba ya maongka ama lir aser iba ama tutoshi angutsüba ya kanga tesüngmangtsüka lir,” ta pai ashi.
Academy Award kata monguaka Scott ya iba sempet asoshi asemben nominate süa lir aser BAFTA sempet ana ngua lir.
1992 küm Scott-i BAFTA indang Special Award angu aser küm asem lir Outstanding British Contribution to Cinema Award angu.
Tangbo pa Charlie Chaplin, Alfred Hitchcock, Steven Spielberg, Sean Connery, Elizabeth Taylor, Stanley Kubrick, Anthony Hopkins, Laurence Olivier aser Judi Dench nungertem den densemogo.
Taoba küm iba sempet ya Mel Brooks-i angu.
“Ridley Scott ya nükla aketba director ka lir aser cinema otsü nung alizüng tongteter British nunger film yanglur ka lir,” ta BAFTA indang chief executive, Amanda Berry-i ashi.
Scott-i tesüsa direct aser produce asüba film ya John Paul Getty indang taküm otsü, ‘All the Money in the World’ ya lir, koba ajanga BAFTA nung Supporting Actor indang nung Christopher Plummer nominate asü.
Pa ya ‘Blade Runner 2049’ nung executive produce liasü aser iba sequel nung BAFTA nung nomination ti aser Oscar nomination pongu liasü.
BAFTA awards sentong ya Tsüklai 18 nung agitsü.