‘Siri’ mesük Facebook-i sentong tasen ka yangluba mapang lir

New York, April 16 (Agencies): 2016 küm Facebook indang CEO Mark Zuckerberg-i yanglutetba ‘Jarvis’ ama ‘Artificial Intelligence (AI) assistant’ tasen ka yangluba mapang ka lir.
Iba sentong tasenba dang ya ‘Facebook M’ ta ajar aser iba AI ya Facebook indang Messenger app nung keta lir.
Apple indang AI assistant ‘Siri’ ama ‘Facebook M’ yagi teyari balala agütsütsü aser Siri dang tajungba aser mapa timba inyaktettsü, ta osang ajanga ashir.
Facebook M ajanga company balala den tongteprateptsüba aser südoksünema senzütsü asoshi ticket jelia mükazüka ayutsü akoker.
Facebook Messenger amshir nisung billion 1.2 lir aser item ajunga nem iba app tasenba ya agütsütsü tamakoktsü asüba ajanga 2015 küm nisung meyirjang ishika nem amshidaktsü.
Iba app tasenba ya takok ngua yangluteta lir saka iba app ka yanglutsü asoshi sen aika indoktsüsa akümba ajanga Messenger amshir ajunga nem agütsütsü kanga tasak lir, ta osang ajangasa ashi.