Sirisena-i teloktep Sri Lanka sorkar tentettsü onük benoker

Colombo, August 20 (Agencies): Sri Lanka Tir, Maithripala Sirisena-i aniba Sri Lanka Freedom Party (SLFP) yimtenren teloki tan hopta agiba parliamentary election sentong nung takok angurtem den külemi lokteper teloktep sorkar tasenba tentetsü onük benokogo.

Sri Lanka-i latetba election ozüng melenshitsü aser sorkari tali ochishia inyaktsü asoshi benokba onüktem SLFP nung züngsemba taoba Sri Lanka Tir, Mahinda Rajapaksa pusemertemi nokdangtsü tenzükba sülen election agitsü mapang atongba jakdang mapang jilia election agitsü asoshi Sirisena-i ozüng agütsü.

Tan Hombar nü agiba election nung Rajapaksa-i aniba SLFP züngsemtemi opposition telok ama shilem agia liasü.

Küm 26 tejaklen nungi tenzükba Tamil telungpur timtem taoba mapang, 2009 nung agienba yong Sri Lanka nübur aikati tangasa Rajapaksa pusema pa sülen anidakba osang bushiteta lir.

Sri Lanka Ato Kilonser, Ranil Wickremesinghe-i aniba United National Party (UNP) teloki tan agiba parliamentary election nung menden timba angu saka sorkar tasen tentettsü asoshi menden 7 agi mabensaba osanga bushitetogo.