Sisi-i tepuokdak puoka alir 100 nem taidok agütsür

Cairo, September 23 (Agencies): Egypt Tir, Abdel Fattah al-Sisi-i Al Jazeera television osangbener 3 densema par tepuokdak puoka alir nisung 100 tashi nem tanü Bodbar nü taidok agütsüba osang jangjaogo.
Egypt nung osangbentsü temela magi osang abenba aser Egypt linük nem lendong bener arutsütsü maparen inyakba ken o nung taoba August ita aitsüba sülen Canada nunger Mohamed Fahmy, Egypt nunger Baher Mohamed aser Australia nunger Peter Greste nunger densemba osangbener 3 nem tepuokdak küm 3 puoka ayutsü temerenshi agüja liasü.
“Tir Sisi-i tanü taidok agüja chiokertem rong nung tetsür 13 densema taoba mapang, 2013 küm ozüng alema sorkar anema longkak aiter aser tepuokdak shiranga alirtema densema lir,” ta sorkar ketdangsertemia metetdaktsü.
Tir Sisi-i yaküm 2014 December ita sangoktsüba ama tan mapa küma inyaka tepuokdak puoka alir nisung 100 nem taidakok agüja parnok tepüokdak nungi chioker lir ta parnokisa shisem.