Sisily nung G7 linüktem anogo ana senden tenzükogo

Rome, May 26 (Agencies): Group of Seven (G7) linüktem anogo ananü senden tanü Hokolbarnü Taormina, Italy nung tenzükogo.
Britain, Canada, France, Germany, Italy, Japan aser United States linüktem nungi tongti lenirtem den EU-i iba senden nung kiralongra, shishilembaba aser alima tsüngsang mopung melenshiba densema tongtibang onüktem nung o lemteptsü.
Hombarnü Manchester, UK nung US tsür kentener, Ariana Grande kenten sentong nung kiralongrartemi amakba lendong nung nisung 22 tepsetba sülen G7 senden nung kiralongra onük ya tongti ser jembitsü, ta osang angazüker.
Iba telok nungi US Tir, Donald Trump aser British Ato kilonser, Theresa May na densema lenir pezü tang mezüng G7 senden nung adentsü, ta osang ka ajanga metetdaktsü.
Iba senden nung US Tir, Trump dang Climate Change indang 2015 Paris Agreement medoktsütsü atema ajungshitsüa akok, ta kasa osang ajanga ashi.
Iba senden amentsü jelia White House Economic Adviser, Gary Cohn-i Sisily nung onük anaprongji kanga tongti süa jembitsüa akok, ta metetdakja liasü.
Kasa senden nung G7 senden amenba linük, Italy-ia Africa nung sen aika intoktsü aser bendangertem tanga linüki oa aliba onük süoktsüa akok, koba ajanga rara aliba tesemtem nungi nisungtemi tanga linüktemi oa aliba tebilemtsü koktettsü. G7 lenirtemisa sustainable growth & development indanga jembitsü.
43buba G7 senden ya Honibarnü tembangtsü, iba sülen linük tenet lenirtemi külem sangdong ka agütsütsü imlar.
Ano tanga osang ka nung, tanü iba senden jelia Japan Tir, Shinzo Abe ajurua jurila senden ka amendang US Tir, Donald Trump-i, raratsü jangraba linük, North Korea tebilemtsü ya koktettsü, ta ashi.
“Iba ya tebilemtsü tuluka lir, iba ya alima tebilemtsü ka lir,” ta ashi.
Hopta ishika tejaklen US Tiri, North Korea lenir, Kim Jong-Un ya nuclear rara osettem aliba sowar ka lir, ta aija liasü.
“N Korea-i missile aser nuclear tendangba ajanga kidanger linüktem aser alima tebilemtsü akar. Iba onük ya tanga industrialised linük dena jembitsü,” ta Trump-i ashi.
G7 senden nung Japan lenir, Abe-ia North Korea ajanga alima nem amokmeren tensa ka bener arutsüba indang jembitsü tebilemba lir.
Japan yimtiba, Tokyo nungi mapusodang pai osangbenertem dang, “North Korea onük ya East Asia atema dang masü saka alima ajak atema amokmeren ka lir,” ta metetdaktsü.
Taküm North Korea-i Hwasong-12 intermediate-range projectile ka densema missile aika tendangogo.
Ano yaküma parnoki nuclear ana tendanga liasü.
N Korea lenir, Kim ya menokdangra tesem nung Japan aser South Korea densema tanga linüktemia nuclear yanglutsüsa akümtsü ta US-i bilemer, aser iba dak sendakba nung US-i N Korea den ken o jembitsü meranger.