Sissi-i kiralongrar den raratsü asoshi Russia ayonger

Moscow, August 26 (Agencies): Egypt linük densemba Middle East nung tang lendong kanga sashia atalokdakja aliba kiralongrartem anema raratsü asoshi Moscow semdangsang, Egypt Tir, Abdel-Fattah el-Sissi-i Russia tanü Bodbar nü ayongogo.

Sissi-i tan agi ita asem tsüngda nung Moscow tanaben semdangba sülen Russia Tir, Vladimir Putin den Moscow kübok Kremlin nung tanü ajurutepa senden amendang iba olenji metetdaktsü.

“Islamic State (IS) densema Middle East nung lendong tsüdong kanga sashia atalokdaktsüba kiralongrartem anema rarabaren nung Eygpt-i Russia teyari nungdaka kümogo,” ta shia, Sissi-i Russia nungi teyari meshia liasü.

“Middle East nung lendong atalokdaktsüba kiralongrartem anema külemi lungjemer raratsü densema kechisarena ajunga nung Russia den tesendaktep tajung ayutsü asoshi Egypt nüburtemi temulungtetba tulu yua lir,” ta pai nenshia ashi.

Par linük anati külemi lungjemer kiralongrar anema raratsü onük benoka jembiba den külemi, Putin o Sissi nati Russia-i yaria Egypt nung mezüngbuba nuclear power station yanglutsü onüka benoka jembiba osang jangjaogo.

Sissi-i tan Russia semdanga par lenisang, Putin den ajurutepba ajanga Egypt-i democracy yimsüsütsü yimya benshia shimtetba mezüngbuba Tir, Mohammed Morsi yimsüsütsü menden nungi tashiyim agi anendaktsüba sülen Egypt o US na tsüngda tesendaktep mejungi akümba mapang ka nung Russia-i Egypt den tesendaktep tajung yanglutsü tenzükba kuli tejangja angur.