SIT-i benokba Chare-sheet magizüker : CCoFA

Dimapur, November 19 (TYO) : SIT-i benokba charge-sheet nung Food & Civil Supply department-i aibelen mapa meinyak ta shia lir, anungji iba charge-sheet magizüker, ta Media Cell, CCoFA-i sangdong ka nung metetdaktsü.
Ketdangser tajungtem liaka, SIT-i parnok teinyaktsü mapa shitak meinyaktetba aser charge-sheet tiyazü benokba angudang kanga aoksar. SIT züngsemtemi pei teinyaktsü mapa atema masü saka pei taküm jenjang atema ang bilema inyakba ama ajiteter. Talisa, parnoki benokba Charge-sheet nung kin dak tenük yoka inyaksangshiba ama ajiteter, ta CCoFA-isa metetdaktsü.
Charge-sheet nung aliba onüktem jungjunga reprangdangba sülen CCoFA-i Chief Minister den ajuruteptsü atema asüngdang, saka anogo 6 süiaka tanü tashi nung CM nungi telangzüba mali. October 18, 2016 nü Chief Minister-i CCoFA dang Charge-sheet benokba nung temulung mesüra, pai ano bushisüngdanger telok balaka tentettsü ta nangzük aser iba ya Chief Secretary ajanga tezüluba nung agütsü, ta CCoFA-isa ashi.
Ajisüaka, Chief minister-i jembiba ama meinyakba atema CCoFA-i kechi junger ta bilemdir inyaktsü. Naga nungeri nangzükba ama mapa inyaker, saka onoki asüngdangaka CM-i ola madokbaji onok mezüngmeshiba lir, ta parnokisa shisem.