SIT-i taoba Goa CM Kamat jaoker

Panaji, April 16 (Agencies): 2013 küm ozüng alema ‘iron ore’ atuba ken o nung Goa Branch, Special Investigation Team (SIT)-i taoba mapang Goa state Chief Minister, Digambar Kamat dang parnok matsüngdangi arutsü jaokogo.
“April 18 nü SIT matsüngdangi arung ta taoba chief minister Digambar Kamat nem metetdaktsüogo,” ta Superintendent of Police, Goa crime branch, Priyanka Kashyap-i tanü osangbenertem dang metetdaktsü.
Iba ken o nung tang agi tanabenbuba Kamat jaoker. 2014 küm February ita nunga SIT-i Kamat jaoka pa dang asüngdangyaa liasü.
Crime branch ketdangser kati ashiba agii, Goa Mines & Geology Department nung taoba mapang director, Arvind Lolienkar-a kasa anogo nung jaokogo.
Iba ken o nung 2014 küm March ita nung SIT-i Lolienkar pua liasü, saka tangbo pa bail nung chioka lir.
Justice (retd) M B Shah Commission osang ajanga ashiba agi, 2005 küm nungi 2012 küm tashi nung Goa nung ozüng alema sen crore 35,000 jenjang ‘iron ore’ tua liasü.
Iba dak sentakba nung 2013 küm July ita nung Mines and Geology Department-i iba maparen nung densema alirtem anema ken o benoktsü atema inyak tenzük.
Iba sülen 2013 küm August ita nung crime branch-i Shah Commission aser tanga committee temi benokba tenüngtem densema Kamat aser Lolienkar nunger anema FIR ka benoka liasü.
Iba FIR ji IPC sections- 120 (b) (conspiracy), 166 (public servant disobeying law), Prevention of Corruption Act kübok section balala, Mines and Minerals Development Act, Mineral Conservation and Development Rules aser Goa Prevention of Illegal Mining Transportation, Storage of Minerals Rules 2004 nunger nung ajemdaker benoka liasü.
Item ken nung ajemdaker ibaji bushisüngdangtsü atema taoba sorkar, BJP-i SIT ya tenteta liasü.