Sitharaman-i defence minister mapa agizükogo

New Delhi, September 07 (Agencies): Tang tasen shimba, defence minister, Nirmala Sitharaman-i Brihostibarnü ministry mapa agizükba sülen lai, la atema tongtibangtiba mapatemji mapang talangka anendaka aliba onüktem aser sepaitem taküm jenjang tajungba atema inyaktsü, ta metetdaktsü.

Arishi küm 55 Sitharaman ya India tsür rongnung tang mezüngbuba Defence minister lir, taoba Deobarnü lai Defence Minister inyaktsü atema tenangzükba agia liasü, aser tanü lai Union Finance Minister aser Defence ministry repsema inyaka alisang, Arun Jaitley ket nungi mapa agizük.

Taoba Ato kilonser, Indira Gandhi-ia Ato kilonser inyakdang iba portfolio bena liasü.

Defence Minister chamber nung Putir kati sarasademtsüba sülen Sitharaman-i iba mapa agizük. Iba sentong nung lar tsüraburtema liasü.

Tamalen commerce minister inyaka alila Sitharam-i osangbenertem den jembidang lai, “Ni asoshi tongtibangtiba mapaji armed forces’ terenemshiba asütsü. Parnok nem nüngdakba senotsü aser osettem agütsütsüji kanga tongtibang,” ta ashi.

Laisa, lai Ato kilonser, Narendra Modi aser Union Cabinet den asüngdangtepa mapang talangka anendaka aliba onüktem bentettsü atema inyaktsü aser ‘Make in India’ mapatong nunga rangloker inyaktsü, ta metetdaktsü.

Defence minister-isa, Make in India mapatong nung defence shilem lir aser ibaji sorkar atema kanga tongtibang, ta ashi.

Sitharaman-i, lendong aliba arrtsütem nung sepaitemi parnok mapa inyaker, anungji parnok kibongtem taküm jenjang tajungba akumtsü atema lai inyaktsü, ta ashi.

Sitharaman-isa, sepaitem nem raraba oset tajungtiba agütsütsü atema lai tongtibangsüa inyaktsü, ta ashi.

Joko la Cabinet Committee on Security nung züngsem ka kümogo. Iba committee nung züngsemtemji Ato kilonser, home minister, external affairs minister Finance minister lir.

Taküm March ita nung Union Defence Minister, Manohar Parrikar-i iba menden toktsür Goa Chief Minister akumba sülen Finance Minister, Jaitley-i defence ministry repsema aben.

Deobarnü Jaitley defence minister ka ama Japan-i oa liasü, aser pa India-i meyipa aruba sülen tang ang la nem ministry bendanga agütsüogo.