Sitharaman-i mezüngbuba GST Council senden nung aden

New Delhi, June 21 (TYO): Union Finance Minister Nirmala Sitharaman-i tanü 35 buba GST Council senden ketdangsüa agiogo.
Taküm May ita Sitharaman-i Finance Minister mapa agizükba sülen tang mezüng atema la menden ser GST indang senden menogo.
Delhi nung senden amendang state finance minister tem aser ministry nungi ketdangsertem aden.
Senden amenba sülen osangbener den jembidang Revenue Secretary Ajay Bhushan Pandey-i ashiba agi ‘council-i National Anti-Profiteering Authority (NAA) indang kümsük küm ana apuloktsütsü telemtetba agi.”
GST mapa tenzükba sülen 2017 küm sorkari küm ana atema NAA tentettsü molunga agizük. Iba ya consumers-i benokba onüktem angdangtsü atema lir.
GST kübok annual returns agütsüba anogo August 30 tashi ita ana atsülangogo, ta Pandey-isa metetdaktsü.
“Tanü amenba senden nung Karnataka, Mizoram aser Telangana state tem maden” ta Sitharaman-ia ashi.
PM Narendra Modi-i mezüngbuba kümsük inyakdang GST Council-i mapa tajung inyakogo, ta laisa ashi.
Council indang teinyaktsü mapa aika lir aser itemji GST Rules tezüpapa kümdaktsütsüba, GST reprangshimtsüba aser GST kübok items talila benoktsübatem lir, ta Union Finance Minister-isa metetdaktsü.