Sitimi tesem nung nisung ka asü, ki kar rongdoktsü; Sorkari mobile SMS & internet data services nokdanger

Kohima, Aenjeti (January) 3 (TYO): Kiphire district kübok Natsami yimer Tongsepi tanü grenade agi pokset.
Tasüsangji arishi küm 55 tain shi ka liasü aser tanü Sitimi yimtsüng nung telok ana tsüngda mepetmesü adoka raratepdang pai grenade ji agitetdang ajungbena apok ta osang angazüker.
Sitimi yimtsüng nung alirtemi iba ken o ya kin o kin na tsüngda mangatettep ken o masü aser iba mepetmesü ya yimtsüng sasep nung dang angatetteptsü onük ka lir ta metetdaktsü.
Aenjeti (January) 3 nungi 5, 2018 tashi Natsami yimtsüng nung Singti Area Students’ Union (SASU) indang 21 buba general session amungtsü ayongzükba nung “Singti” ta amshiba atema mangatettepji adok, kechiyong District Administration-i “Singti” nüngja mamshitsü atema tetuyuba ka agüja lir.
Sitimi yimertemi tawa tu district administration dang Natsami nung ‘Singti” ta amshiba atema ken o ka benok aser iba atema Kiphire Deputy Commissioner-i SASU dang iba tenüng mamshitsü tetuyuba agütsü saka parnoki tashi mang ta osang ajanga ashi.
2000 küm USSC conference ayonga amungdang Sangtam nungeri “Sitimi” melena “Singti Area Student’s Union” ta amshi aser iba nungi mangatettepji adok ta osang ajanga shisem.
Iba tenüng amshibaji Sumi nungeri magizük aser parnoki “Sitimi Area Sangtam Student’s Union” ta tenüng melentsü atema shidanga liasü.
2014 küm Kiphire Deputy Commissioner-i Singti ji unofficial ta sangdong saka Singti Area Student’s Union-i iba tetuyuba sülen manidaki tanü tashi iba nüngja amshia arur, ta osang ka ajanga metetdaktsü.
Sangtam nungeri nüngja amshiba atema Sitimi nung aliba Sumi nunger kar jashi aser iba jagi parnoki Sangtam khel nung aliba ki kar nung mi senoktsü ta osang ajangasa ashi.
Iba mangatettep ya yimtsüng sasep nung angatetteptsü onük ka lir anungji iba mepetmesü ya kin ana tsüngda ken o ka ama mangatetdaktsünür ta Sitimi yimer kari ashi.
Sitimi tesem nung tensa mejungi akümba atema Nagaland sorkari tebilemtsü bena Aenjeti (January) 2, 2018 nungi tanga osang ka mesangdong tashi Sitimi tesem nung bulk SMS, mobile internet aser data services nokdangtsü tetuyuba ka agütsüogo.