Sivasagar arrtsülen aonung curfew lir

Dimapur, January 27 (TYO): Assam nung Sivasagar District kübok Nagaland den arrtsüa aliba tesemtem nung January 9 nungi tenzüka anogo 60 atema aonung 6:00 ako nungi anepdang 6:00 ako tashi curfew benoka lir, ta Sivasagar Additional District Magistrate, Moon Gogoi-i metetdaktsüogo.
Section 144 Cr.P.C ji arrtsülen kilometer 5 telongtet nung lir. Assam/Nagaland arrtsü adena arur lokti anema /alia oa ozüng alema inyakertemi nisung taküm samatsütsüsa, rakzükraktemba aser public kiojen raksatsüsa mapa inyaktsü kulitem anguba nung ajemdaker curfew alitsü benok, ta Moon Gogoi-i sangdong ka nung metetdaktsü.
Aonung 6:00 ako nungi anepdang 6:00 tashi nung Nagaland den arrtsüa aliba Sivasagar district tsütsü Assam kübok kilometer 5 telongtet nung nisung, telok mesüra gari senzütsü memelar, ta tetuyuba nung shia lir.
Ajisüaka Magistrate, army, CRPF aser Police ama security sepaitem aser duty nung alir civil ketdangsertembo iba ozüng küboki maiter. Iba tetuyuba anema inyakra section 188 IPC kübok temerenshi agütsütsü, ta Sivasagar Additional District Magistrate-isa metetdaktsü.