Six Nation Hockey: India-i goal 2-1 agi Ireland akok

New Delhi, June 28 (Agencies): India nunger hockey asayar teloki goal 2-1 agi Ireland madak takok ngua tang tasayadak Six Nation Hockey Tournament nung tanü, Mongolbar nü shilem agiogo.
Tanü asaya 1 buba quarter nung Kyle Good-i asaya tenzüker minute 4 buba nung goal 1 agüja par Ireland telok temaba jenjang nung ajungkettsü.
Tesülen, 2 buba quarter nung, asaya tenzüker minute 22 buba nung forward asayar, Talwinder Singh-i India telok asoshi goal 1 agüja par telok anaprongla kasa jenjang kümdaktsü.
Yamaji asayar külen, asaya tenzüker minute 38 buba nung India captain, Sardar Singh-i 2 buba aser takokba goal agüja India nem takok ngudaktsü.
India teloki tetenzükba asaya nung goal 0-4 agi Germany telok nem takok ngudakja liasü.
Ano külen, India teloki 2016 Champions Trophy asayamong nung 3 buba jenjang ajangzükba sülen par telok World Rankings nung 5 buba jenjang tonga atuba osang ka International Hockey Federation (FIH)-i tanü metetdaktsüogo.
World Cup & Champions Trophy 2016 takok marok agizüker, Australia telok maneni temaba jenjang nung aliba osang jangjaogo.
Australia telok sülen anidaka, Netherlands aser Germany na 2 buba aser 3 buba jenjang nung aliba osanga FIH-isa metetdaktsüogo.