SKR ‘Dirk Gently Holistic Detective Agency’ tanabuba season nung shilem agitsü jaok

Mumbai, February 20 (Agencies): Bollywood nung nüngtugu actor Shah Rukh Khan American science-fiction series Dirk Gently’s Holistic Detective Agency tanabuba season nung ‘guest star’ ka ama shilem agitsü asoshi producer Arvind Ethan David-i jaok. Iba BBC jilushi ya Douglas Adams otsükaket nung ajemdaker yangluba TV series ka lir. Iba otsü nung ya ‘titular holistic detective’ kati supernatural case balala bushisüngdanga adoker.
Arishi Küm 51 tain Bollywood actor yagi iba TV series ya nüngtugu otsükaket nung ajemdaker yangluba ta memeteti liasü. Iba dak sendakba nung pai twitter ajanga noksa lemsatepa zülutsüba nungi tenzük, “Dirk Gently” ya TV series-a ta ni memetet liasü. Adam kü dang taitokang. Iba noksa ya kecha dena sendaktepa mali, saka odang inoktsüba lir,” ta SKR-i tweed asü.
Iba tweed ya David-i meteta aruba sülen pai SKR film nung shilem agitsü asoshi jaok.
“@iamsrk ya #dirkgently sapur ka metetbaji kanga jangratemtsüka. #Season2 nung guest star ka ama arua shilem agiang,” ta tweet asü. Maneni tanga tweet ka nung pai yamai ashi. “#ShahRukhKhan-i #dirkgently sapur ta metetba atema jangratem ya takoktsü na? pai reprangtetogo ta nenoki bilemer asü?”
SKR-i iba nung kara kara telangzüba agüja yamai post asü. “Kü nem mapang aser tesem metetdakjang, aser ni kechi shilem nung apettsüar aji reprangtepti.” Iba sülen David-i pa twitter ajanga maparen tembanga telangzüba agütsü.
Iba show nung Hollywood nung-i nüngtugu actor Samuel Barnett, Elijah Wood, Hannah Marks aser Fiona Dourif nungertemi shilem agir.