Skylark-i 1 buba Master Shield T20 takok marok agizükogo

1 buba Master Shield T20 cricket asayamong champions, Skylark teloki tongti tesemdanger, Mokokchung Dy. SP (R), Lipoktemsu aser asayamong tayongertem den aroki agiba noksa ka yangi angur. (Mokokchung, February 02)

Mokokchung, February 02 (TYO): Skylark teloki wicket 5 agi Clippers telok madak final asaya koka taoba January ita 28 nü nungi tenzüka Mokokchung kübok Imkongmeren Sports Complex nung asayaba 1 buba Master Shield Twenty20 (T20) Cricket Trophy tanü, Mongolbar nü agizükogo.
Champion team, Skylark-i asayamong jung aser kulikaket den senpet sen 30,000 agizük aser tanabuba jenjang angur, Clippers telokia kulikaket aser senpet sen 15,000 agizüka liasü.
Individual shilem nung tanü asaya nung runs 30 yangluba den wicket 1 agisang, Skylark asayar, Kenny Solo-i final asaya nung Man of the Match sempet agizük; ajak agi runs 99 yanglusang, Musafir asayar, Imtisünep-i Best Batsman of the Tournament; wicket 5 agisang, Trebuchet asayar, Imliwati-i Best Bowler; Clippers asayar, Bhir Bahadur-i Man of the Series aser Illume teloki Best Disciplined Team sempet agizük.
Cricket asayatsü shilem nung lanurtem ajungmesotsü nükjidong nung Mokokchung District T20 Cricket Federation-i tan asayamong ya ayonga liasü.
Tanü final asaya nung Clippers teloki mezüng batting asü aser par teloki ajak agi runs 98 yanglu saka Skylark teloki Clippers teloki yangluba runs ajangteta wicket 5 agi takok angu.
Tanü asayamong shibangba sentong nung Mokokchung Dy. SP (R), Lipoktemsu tongti tesemdangser liasü.
Ano, tanü final asaya nung Lanu aser Achet na Umpire, Obangtoshi 3rd Umpire aser Aosungkum match referee liasü.