Sloane Stephens WTA finals atema qualify süogo

Mongputeni/October 16, 2018 (Agencies): Taoba US Open champion Sloane Stephens, Singapore nung asayatsü aliba WTA Finals nung asayatsü asoshi qualify süogo, ta WTA Tour-i tentonü metetdaktsü. Iba asayamung nung shilem agitsü asoshi Simona Halep, Angelique Kerber, Naomi Osaka, Petra Kvitova aser Caroline Wozniacki nunger den Stephens densemogo. Iba asayamung ya Mongputeni/October 21 nungi 28 tashi asayatsü.
Iba asayamung nung shilem agitsü asoshi ano asayar ana shimtsü aser asayartem rongnungi Elina Svitolina aser Karolina Pliskova na qualify asütsü imlar. Iba asayamung ya round-robin yimya nung asayatsü aser senpet USD million 7 agütsütsü.
“WTA Finals nung shilem agitsü asoshi maongka anguba ya kü atema tetushi ulura. Iba season nung asayar tajungtibatem den tokteptsü asoshi ni yongyaa atar,” ta Stephens-i ashi.
America tsürla yagi la asoshi mezüngbuba Premier-level event ka taküm küm tetenzüklen koka liasü aser Chiteni/July nung la jenjang asembuba tonga atu. Arishi küm 25 tain asayari taküm Montreal open nung tanabuba jenjang tongteta asayaogo.
Stephens-i la asoshi mezüngbuba Grand Slam title 2017 küm Flushing Meadows nung akok saka la takümbo quarter-finals nung Anastasija Sevastova-i tsükdaktsü.
Osaka-i US Open kokogo aser kasa mapang nung Kerber-i Wimbledon aser Wozniacki-i Australian Open kokogo.