Slum Soccer teloki FIFA Diversity Award agizükogo

Manchester, September 27 (Agencies): India nung tentetba Slum Soccer teloki alima ajunga nung football asaya ketdang asür, FIFA teloki tan asensüa agütsüba Diversity Award yashi, Hombar nü agizükogo.

“Slum Soccer teloki Diversity sempet agizükba ya football denbo cricket tongtipangbasüa züngshiba linük, India asoshi kanga dang tongtipang lir,” ta Slum Soccer nung CEO, Abhijeet Barse-i metetdaktsü.

“Football asaya den sentakba osang madoktsütetba linük, India atema tan sempet agizükba ya kanga dang jangratemtsü aser temulung tangtsü lir,” ta Barse-i Soccerex Global Football Convention sentong nung sempet agizükba sülen pelaseta ashi.

Slum teloki The International Gay & Lesbian Football Association (ILGBTFA) aser Britain nung tentetba meimchir bendanga benshiba anemer tentet, Kick It Out (KIT) na den temaba jenjang ngua, tan sempetji agizüker lir.

Slum Soccer telok ya lokti tentet ajunga nung medendaktsüi züdoka yutsüba tila tanurtem aniteta, parnok taküm jenjang tajungba kümdaktsütsü asoshi football asayatsü terenemshiba agütsüba telok ka lir.

“Ozü teloki yimtitem nungi dang masü saka yimtsütem nungi anogo shia tanur 12,000 shi aniteta ozü saisapong mapatong nung densemdaktsür,” ta Barse-i osang jangjashitsü.

Slum Soccer telok ya Barse-i küm 14 tejaklen tentetba osang jangjaogo.