Smart Cities inyakyim ya tai: Mamata

Kolkata, June 7 (Agencies) : Mongulbarnü West Bengal Chief Minister Mamata Banerjee-i, Smart Cities inyakyim aser tebilembatem ya tai, ta ashi.
“Smart Cities inyakyim kübok küm pongu nung state sorkar temi sen crore 500 inoktsü aser centre-i küm shia sen crore 100 inoktsü lateta lir. Kodang jungjunga bilemdangdir iba inyakyim nung state sorkar ket nungia küm shi sen crore 100 aotsü adoker. Iba sen yagi yimti rangben masü saka nüngdakba tapu ajak aliba ki ka dang yanglutsü. Süra yimti rangben nung aliba tanga tesemtembo odang toktsütsüba na?” ta lai asüngdang.
“Sen crore 500 ji melaluba tajungba asütsü. Iba sen jagi tanga mapa aika inyaktettsü,” ta lai ashi
State nung terenlok mapa inyakba mapang kecha marendaki inyaktsüla ta business chambers dang lai ashi. Agency kari danga yimsüsüba tsütsü nungi terenlok mapa nung tebilemtsü mesüra mangatettep adokdaktsüra ozüngi melaba ama inyaktsü anungji metsübui inyakang, ta lai shisem.
“Bengal nung yimti trok tashi renema lir. Iba mapa ya smart cities danga tuluba lir. Asenok ket nung ali lir aser business nisungtemi item project tenzüktsü,” ta lai ashi.
“Onok dang imlibilema mapa temela aser tasak bendanga shiang. Project renemdang mapang intoktsü tenüngdaktsü mali,” ta lai industry nung mongintem dang ashi.
Lai, Credai (Confederation Of Real Estate Developers’ Associations Of India)-i koda sür ola madoker aser kechiba project tasen ka danga metenzüker, ta asüngdang.
“Rongsen kettsüng majungba dak tongloktsütsü mali. Market kanga majung asü mesüra asenoki majung kümdaktsür?” ta laisa ashi.