Smart Cities masü Smart Villages atema inyaktsüla: Azam

Lucknow, September 08 (Agencies): Narendra Modi lenisüba nung BJP-i aniba NDA sorkar Smart City project aija tanü Uttar Pradesh minister Azam Khan-i, yimtsüng nung alirtem jilai oa aliba ajema akümtsü atema sorkari “smart villages” nung ang temelung agütsütsüla, ta ashi.

Khan, shibai teshimtet telok ka anir smart cities seminar ka nung adentsü atema Columbia-i anir oa liasü, pai, “Linük nung smart cities atema Central sorkari sangdongogo aser World Bank dang nungi teyari meshiogo,” ta ashi.

Pai ashiba agi, yimtak yimtsüngtem nung alirtem yimti aser jilai oa aliba kanga bulua kümogo. “Iba ya ajanga yimtitem atema khuret tali bendenloktsü,” ta ashi.

Uttar Pradesh Urban Development Minister-i, yimti shia nungji nütsüng yongsük tatakzük ka lir, aser nüburtem tali arua alibaji ajanga temzüng ozüng azüoka ayuba nung timtem tali adokba den kiojen aser power rates nunga tebilemtsü adoktsü,” ta ashi.

“Smart city project ya ajanga yimtsüngtem nungi nisung taliba yimtii oa alitsü. Anungji, iba (senotsü) ya smart villages asoshi amshia school kitem yanglutsüba den light aser tanga nüngdaktem nung terenlok asoshi amshitsüla ta nibo bilemer,” ta paisa ashi.

Yimtitemji smart lir masü no? ta shia pai, “Lucknow, Kanpur mesüra Varanasi yimtitem ya smart masü-a ma (?)” ta ashi.

Narendra Modi aitsüba olen ka nung Khan-i, Samajwadi Party sorkari Varanasi nung terenlok mapa aika inyaktsüogo, iba ya Ato kilonwer adokba tesem lir. “Ajisüaka Varanasi atema Centre-i sen kata magütsü,” ta ashi.