Smart Cities project ajanga teraksatsüba alitsü: Hazare

Ralegan-Siddhi, June 29 (Agencies): Bodhbarnü Social activist, Anna Hazare-i, Ato kilonser, Narendra Modi’er ‘Smart Cities’ mapatong ajanga India nung yimtsüngtem rongsenkettsüng raksatsütsü, ta ashi.
Shidi tapak asem nung Ato kilonser dang Hazare-i, Mahatma Gandhi-i yimtsüngtemji self-sufficient units ama renloktsü atema jembi, Modi-i urbanization aser ‘Smart Cities’ atema jembir, ta shia lir.
Hazare-i ashiba agi, nüburtemi yimti/jilatemi oa litepba ajanga petrol, diesel, kerosene aser nagmati atsükba tali kümogo, koba ajanga tashitak tali adoker aser alima tatsükba kümdaktsüba den külemi rüjep yimsaa tzüyim level timba akumer.
Paisa, India nüjiso anguba sülen nungi tenzüka küm 68 nung yimtitem nung oa litepba ajanga nütsüng timba akumba densema tebilemtsü onük aika adokogo, ta ashi.
Mahatma Gandhi-i ‘Yimtsüngtemi oang’ ta jembiba tetshia Hazare-i Modi dang, terenlok atema yimtsüngtemji tiyongtsü kümdakjang, koba ajanga lenla ajaklen nungi linük tajangzük angutsü, ta ashi.
June 25, 2016 nü Pune nung  Smart Cities Project tenzüktsüba sentong nung Modi-i jembiba o meyipja  Hazare-i iba shidi züluogo.
Ahmednagar district nung par yim, Ralegan-Siddhi tatishitsüa amshia pai, Gandhi tangatetba sülen anidakba ajanga nütsüng shilem 80 ayatzüra tia nung aliba yim nungi tangbo sen core aika indang aonsotsü adokdaktsüteter aser anogoshia tajemba agi mamatzü litre 5,000 adokdaktsüteter, ta ashi.
Paisa, tangbo yimtak lanurtem mapa nung lir aser sen aika aazükteter, parnok yimtitemi ao asübo ishiba aazükla. Tangbo yimtak parnoki tangalen nungia aayangertem jaoka inyakdaktsüer, ta ashi.
“Iba dak sentakba nung nisungtemi shiba shitak ta ratamatatsü. Gandhi-i yimtsüngtem nung terenlok atema jembi aser Modi-i yimtitem ajungkettsü atema jembir. Nüburtem melungjang nung item tasüngdangba lir,” ta paisa ashi.