Smart City Project atema Kohima shimogo

Kohima, Sept. 20 (TYO): Tanü Centre-i Smart City atema yimti 27 sangdongba rongnung Nagaland yimtiba, Kohima züngokogo.
Municipal Affairs Parliamentary Secy., R Tohanba-i Smart Cities tarensen nung Kohima züngokbaji alizüng tuluka tongtetba lir, ta ashi.
“Iba project nung densemba atema onok kanga pelar aser nüma atanger,” ta paisa ashi.
Naga Mothers’ Association, Naga Students’ Federation aser Kohima yimti kübok Kohima Village nüburtem densema state yimti nüburtemi nungitba ajanga iba alizüng tongtetogo, ta paisa pelaba olen ka metetdaktsü.
Centre sorkari Smart City project atema Kohima-a shimba atema pelaba lemsatepdang Tohanba-i, iba ya ajanga sensotemi imlaba ama infrastructure aser facilities nung terenlok alitsü imlar, ta ashi.
Iba project kübok yimti nung tzü, power supply, sanitation & solid waste management systems, transportation, IT connectivity, e-governance, security aser public parks densema lenmang aisülen terenlok katsütsü.
Mezüng küm smart city yimti shia nem sen crore 200 agütsütsü aser tanüngba küm asem- küm shia sen crore kaka agütsütsü.
State sorkartem aser urban local tentettemia Centre-i agütsüba den külemi senotsü inoksemtsütsü. Centre sorkari 2019-20 küm tashi nung yimti 100 nung terenlok mapa inyaktsü nükjidong lir.