Smart city project atema Northeast nung 90:10 ratio nung mapa inyaktsü mepishir

Agartala, July 16 (Agencies) : Tripura Chief Minister Manik Sarkar-i Urban Development Minister M. Venkaiah Naidu dang smart city mapatong inyaktsü atema northeast state tem asoshi 90:10 lemdangang ta mepishi.
90:10 telemsa nung Centre sorkari shilem 90 aser state sorkari shilem 10 atema sen agütsütsü.
Hokolbarnü Sarkar-i New Delhi nung Naidu den ajurutep aser idangji tangar memenepba northeast state tem asoshi senotsü inyakyim balaka tenzüktsü atema mepishi, ta Tripura Urban Development Minister, Manik Dey-i osangbener dang ashi.
Smart city mapatong atema tang senotsü maparen telemsaji 50:50 inyakyim nung lateta lir.
“Centre sorkari tenzükba project ajak nung 90:10 ratio nung inyaktsü ta taoba mapang Finance Ministry-i sangdong ka nung metetdakja lir” ta Dey-isa shisem.
“Sarkar-i ashiba nung Urban Development Minister Naidu-i tenangzükba kecha magütsü” ta paisa ashi.
Northeast state temi smart city projects inyaktsü atema senotsü timtem ajurur aser tanga northeast state temi kasa temepishiba agüja lir, ta Dey-isa metetdaktsü.
Tang tashi nung northeastern region nungi yimti asem- Guwahati (Assam), Imphal (Manipur) aser Agartala (Tripura) tem smart city kümdaktsütsü atema shimteta lir.
Smart city atema fast-track competition nung Shillong (Meghalaya), Aizawl (Mizoram), Kohima (Nagaland) aser Pasighat (Arunachal Pradesh) yimtitem dena liasü saka parnoki telatetba kar metongtetba ajanga meshimtet.
Tripura Chief Minister-isa Urban Development Minister dang Pradhan Mantri Awas Yojana (Urban), Atal Mission for Rejuvenation and Urban Transformation, Swachh Bharat Mission aser Heritage Development and Augmentation Yojana scheme tem atema northeast state tem nem senotsü telemsa balaka agüjang ta mepishi.