SMART Policing atema RRU aser Nagaland Police lungjemer

Dimapur, Chiteni/July 06 (TYO): Advanced training, research aser sentong balala ajanga SMART policing jenjang tajungbai ajungkettsü asoshi bendanga agütsür inyakba nung akangshia Rashtriya Raksha University (RRU) aser Nagaland Police tsüngta tezüngzüktep ka agiogo.

Northeast Region tajungba kumdaktsütsü asoshi tongtipang mera ka agia tan hopta Memorandum of Understanding (MoU) ka online ajanga zülutepa liasü.

Nagaland Police tenüng nung Rupin Sharma, IPS, DGP; Sandeep Tamgadge, ADG (Law & Order); R. Kikon, ADG (Adm); aser R. Tetseo, IPS, IG (TRAINING) nungertemi shilem agia liasü.

Technology balala yanglutsü, academic tsütsü külemi inyaktsü aser Northeast region nung nüngdakba ama projects tem yanglua mapa kuma külemi inyaktsü asoshi iba tezüngzüktep nung shia lir.

Nagaland Police ketdangsürtemi ozüng balala mapa kuma amshiba nung tetsükdaktsü ajuruba ajangtettsü asoshi nüngdakba skills aser shisatsü agütsütsüsa yangluba training programs tem RRU ajanga agütsütsü.

RRU aser Nagaland Police külemi mera agiba ya ozüng tem mapa kuma inyakba aser amshiba aser Northeast region tekumkumba kumdaktsütsü asoshi tongtipang mera ka alitsü.

RRU aser Nagaland Police lungjemer Advanced Training, Research and Innovation, Technology Integration aser Northeast-Focused Projects amala inyakyim nung rangloktsü.

Nüngdakba training aser sendakba inyakyim ajunga sorkari scheme kübok inyaktsü.

Rupin Sharma, IPS, Director General of Police (DGP), Nagaland ajanga iba partnership pela agizükba mapang, iba MoU ajanga jenjang tulu akaba teyari agütsütsü aser police ketdangsürtem SMART officers akumtsü, ta ashi.

Iba ya ajanga Nagaland Police Force indang tashi ulushitsü, ta paisa ashi.