Smile Train India-i angati agi cleft surgery sütsüogo

Kohima, Mongputeni/October 18 (TYO): Smile Train India ya alima nung cleft charity tulutiba lir aser parnoki Kohima nung anogo ana tashi tebangmechi jimar asor tanurtem nem angati treatment agütsüogo. Cleft surgery sentong ya Shija Hospitals and Research Center, Imphal aser Oking Hospital, Kohima na longjemer ayongzüka laisü. October 15 aser 16 nü Nagaland kübok tesem balala nungi tanur tenet tashi angati agi surgery agitsüogo. Iba dak alia angati treatment, mozü aser senzüsenpongba allowance patient nem agüja laisü.
Iba ajanga Smile Train partner Shija Hospital indang Nagaland Cleft Outreach Program 39buba tembangogo, koba 2012 küm tenzük aser tang tashi nung Nagaland nung cleft surgery angati agi 425 sütsüogo.
2000 küm nungi tenzüka Smile Train India-i linük nung mozüki 150 dak tema den longjemer tebangmechi jimar asortem nem cleft treatment angati agi agüja arudar. Smile Train India aser Shija Hospitals and Research Centre, Imphal-i 2006 küm nungi tenzüka Manipur aser kidanger state tem nung cleft surgery 3900 dak tema agitsüogo.
Cleft surgery program 39buba takok ngua agitetba atema Shija Hospitals and Research Centre aser Oking Hospital nem tenüngsang agüja Ishani Biswas, Program Manager, Smile Train India-i ashiba agi, “onok partner Shija Hospitals and Research Centre aser Oking Hospital nati tejangraba tulu nung bendanga agüja inyakba ajanga Nagaland nung alizüng balala tongtetba nung onok nem teyari agütsüogo. Onoki maneni cleft surgery angati agi agüja tanurtem aika taküm melenshitsütsü imlaa atar.”
Kasa mapang nung Nagaland Cleft Outreach Program indang jembidang Shija Hospitals nungi Smile Train Project Director Dr. Kh. Palin Singh-i ashiba agi, “Smile Train India-i angati agi tebangmechi jimar asor tanurtem nem world class treatment agütsüba atema pelar. Kibong aikati cleft surgery matur. Smile Train India-i surgery angati agi agütsüba dang masü saka pre aser post-surgery operative care agütsür.”
Smile Train India-i linük nung mozüki 150 dak tema den longjemer cleft surgery angati agi 600,000 dak tema agitsüogo.