Smriti-i kanga sangra-a yazü jembiogo: Congress

New Delhi, Feb. 27 (Agencies): JNU ken o nung HRD minister, Smriti Irani-i Parliament nung tiyazü jembiba atema opposition party Congress-i la anema parliament nung onük benoktsü lemtetogo.
Tanü New Delhi nung osangbenertem den jembidang Congress general secretary, Mukul Wasnik-i, HRD minister-i Parliament nung yazü jembiba atema la anema ‘privilege motion’ benoktsü,” ta metetdaktsü.
Kasa osangbenertem senden nung taoba mapang Union minister ana- Kumari Selja aser Manish Tewari natia jembia liasü.
“Tia makai Dalit nunger kaketshir Rohith Vemula soseta asüba tatalokba indang Parliament nung jembidang Minister (Smriti Irani)-i ochi kanga apayua jembiba dang masü saka lai kanga sangra-a yazü jembiogo,” ta paisa ashi.
Wasnik-i ashiba agi, Parliament nung Minister Irani-i jembiba o aser Rohith tetsüi jembiba o naji meputer.
Yashi Rohith tettsü, Radhika Vemula-i, lai Smriti Irani ajurua la dang, kechi nung ajemdaker lai Rohith ji linük anemer ka ta sangdong ta asüngdangner, ta jembia liasü.
Rohith’er kinüngertemisa, HRD Minister-i Parliament nung yazü jembiba ajakji jungkai adoktsütsü, ta shiogo.