Smriti Irani-i education policy atema RSS teloktem den sensaksem

New Delhi, July 18 (Agencies) : Honibarnü Union HRD minister, Smriti Irani-i RSS-den tesendaktep aliba education telok ketdangsertem den ajurutepa senden agiogo ta osang angazüker.

Union HRD ministry-i education policy tasen ka yanglutsü atema mapa inyakba tiyalung nung lai iba senden agi.

Linük asoshi education policy tasenba dak sendaba onüktem den ano tanü-asüng shisaluyimbaren nung linük meimba indang tesayuba aser akhidang India nungeri benshiba  yimyatsütem enoksemtsü atema tebilembatem lemsatep.

Taruba hopta Nainital nung RSS pur anogo asemnü senden alitsü sentong lir aser ibaji matongdang Irani-i iba senden agi.

Taoba mapang education telok kari course curriculum nung Sanskrit aser vedic tesayubatem enoksemtsü atema tebilemba metetdakja lir.

RSS tentet Bhartiya Shikshan Mandal-i taoba hopta class 9 nungi 12 kaketshirtem atema education indang draft outline ka agütsüba nung parnok dang pei tetsü oshi den classical language Sanskrit mesüra tanga oshitem – Arabic, Persian, Latin mesüra Greek amala sayutsüla ta shia lir.

Iba draft dang ‘Bhartiya Education Outline’ ta ajar aser iba nung kaketshir kati küm 8 primary education azüngba sülen küm pezübo economic dak sendakba subject ya “compulsorily” azüngtsüla ta shia lir.

Taküm June ita Dinanath Batra-i leni aniba Shiksha Sanskriti Utthan Nyas-i linük nung aliba school tem nung vedic maths agitsüla aser state ajak nung oshi asem inyakyim tenzüktsüla ta shiogo.

Linük nung tang aliba education system nung “Indianness” mali ta RSS joint general secretary, Krishna Gopal-i aitsüogo aser pai ashiba agi education system ajanga kaketshir ka pa tamendakdak, sobaliba aser tamangba tsütsü tesayuba agütsütsüla.

National education policy tasenbaji taküm January ita nungi tenzüka inyaker aser taküm küm tatemlen tembangtsü imlar.