Snapchat pur Anogo ka nung sen Billion 1.5 takoksa alu

Metsüremi 17, 2018 (Agencies): Snapchat nung kidang mepetmesü adokba (domestic violence) temai adokdaktsüba indang ad ka sayuba, kentener Rihanna-i aitsüba sülen Snapchat stocks shilem 5 shi agi tajemba kümogo. Lai 2009 küm la tedong Chris Brown-i la dak teka sangshiba indanga shisema liasü. Iba tatalokba sülen social media balala nung nüngtugu nisung Chelsea Clinton nungeri dena Snapchat puri iba ad sayutsü asoshi telemtetba agiba ashishiba sülen Snapchat stocks Yangtepnü tajemba aküm, ta time.com sangdong ka ajanga metetdaktsü.
Snapchat puri iba ad ya Yangtepnü delete süogo aser BBC den sensaksem ka nung parnoki tatok meshiogo. Parnoki ashiba agi, “Iba ad ya asadangogo aser tai ta jangjaogo kechiyong iba ya onok indang advertising guidelines den mapet. Onoki iba ken o ya jangjaa akümba sülen taoba hopta indokogo. Iba tatalokba atema onok dang tai dokang.”
Ajisüaka iba sangdong ajanga Rihanna-i company telemtetba anema jembiba menokdangtet. Yangtep anepdang kentener yagi iba ken o dak sendakba nung la tebilemba Instagram ajanga lemsatepa liasü. “Snapchat puri parnok ya kü atema favourite app ka masü ta jangjaogo. Ni parnoki kechiba iba ya inyak ibaji metettsü asoshi merangdar! Ni iba ya parnoki madongba ajanga ta shiner saka parnoka iba tashi yabo madong masü. Nenoki DV victims tem nem maksü bener aruja parnok menütsütsü asoshi metetsümonga sen indoka iba ya animate süa yangluogo… ajisüaka taoba mapang tem nung tanur, tetsür aser teburtem kidang timtema aliba purtem aser tang iba amala jenjang nung aliba purtem, onok ajak nenoki maksüdaktsüogo. Iba app ya indokang,” ta lai zülutsü.
Rihanna-i iba olen ya lemsatepba sülen Snapchat pur stock shilem 5 shi tajemba küma liasü.
Iba tatalokba ya Snap Inc. pur atema taküm küm mezüngbuba masü; Tsüklai nunga Reality TV star Kylie Jenner-i Snapchat anema tweet ka asüba sülen parnok stock shilem 7 agi tejemba küma liasü.