Sobaliba anogo

Nagaland kaketreju nung taküm küm nungi college-tem nung anogo ka agiteta sobaliba anogo among tenzükba ya Naga nunger sobalibaren nung asentenshi tenzükba mapang ka asütsü. Tazüngba degree tuluka liaka, sobaliba memetetra, pa mesüra laji lokti nung nübortem asoshi tajung inyaktsütsü bilemba nisung ka küma melitettsü. Tazüngbo talangka azüng aser ita sena tulu chia mapa inyaker saka pa mesüra la nungi shinga kecha teyaria mangur ta asüba nisungtem, parnoki lokti tebilemtsüa memetet aser loktia parnok memetet ta alima nung ali mali ka ser aotsü purtemji sobaliba memetetba purtem asütsü. Sobaliba memetetba agi pei kin aser nübortem memeim akümer, kechiyong pei tsürabur, kinunger, yimtsür yimer aser pei kin aser nübortem den tepela aser tejashi mapang ajak nung külemi alitsüsa sendaktepdaktsübaji sobaliba ya lir. Sobaliba ya pei kidang pei tetsü oshi jembia tenzüker, pei kin sübosülemtsü meteta sapua agir, pei jakzükba lipok aser kin kidong otsü meteter, tangar den putepa lia aotsüsa jayajako aser jembishinü yimya meteta benshir, pei ki kilong aser kima merüka ayutsü, ajemalutsü aser tangar akümtsübutsü, kidang kiyongertem den putepa alitsü, lokti aser yimten nüngdak peisasa reprangteta yaritsüba ajak ya asen sobaliba lir. Sobaliba memetetba nisungi tangar oshi dang jembitsü, pei kin sübosülemtsü sempatsü, yim nübokoki maotsü, tenla agütsütsübajibo yutsür yimkong saru dena magütsünütsü. Tangar dak nendaka melii tangarang yaritsü merangba nisungji sobaliba metetba nisung lir. Sobalibai nisung ka libaliro azüoker asünungji sobaliba metetba nisungibo aginüyonga kasa kin kidong nungi kibalembu masü aremer. Sobaliba ya tangar kari kangshia ozüng agi asenok nem inyakdaktsüba maparen kabo masü saka tsüraburtemi inyakyim tajung tenteta yutsüba jilu ajizüka, peisasa itemji pei taküm nung tajungba meyushia amshiba jakla yimya, jembishinü aser inyaksangshibatem lir. Tang Nagaland nung college-tem nung among tenzükba sobaliba anogo nung kaketshir aser tesayurtem ajak pei kin sübosülemtsü agidaktsür. Atangji, süoshi agitsübaji Nagaland ajunga nung kasa mesütettsüa akok, itemji tatsük temekong tesem aser mapang agir ketdangsertemi tajungba shimtettettsü. Iba ama anogo nung sobaliba süoshi agiba ajanga kaketshir shiai pei mulungjang nung pa mesüra laji shiba, kechi kin aser kong nungi aru ta asübatem tali metetnüa aitdaktsür. Aji oda, iba anogoji kaketshir aika asoshi pei taküm aser kibong meyipa reprangdangba anogo ka akümer. Aji dang masü saka kaketreju nung sobaliba sübosülemtsü agiba ajanga item sübosülemtsü ataker, arür aser yanglurtem aika senotsü nunga tajangzük angutsü. Aji oda, college nung pi bendanger meyong blazer mesüra coat ka agitsü agibo pei kin sü agi yangluba  coat mesüra sü agibajisa tazüba aser tetezü taliba asütsü. Iba ama sobaliba anogo nung kaketshir telok teloki sobaliba ken atentsü, yar tsüngsangtsü aser amen ken tenteptsü. Ano, kaketshir kari sobaliba otsü mesüra tar nunger otsüa dena ashitsüa akok. Iba ama anogo nung nisung karibo tsüraburtem mapang sobalibaa aruba indang video yanglua bener arua sayutsü akok mesüra asen sobalibaren tapu balala nung mobile phone ajanga video yanglu toktepba sentonga alitsüa akok. Kodang asenoki iba ama sobaliba anogo ya alima nung nüngtugu kümdakja mongdir, tanga university nungi asen sobaliba angazüki arutsü aser asenoka parnok university nung parnok sobaliba indang angazüktsü jaoktsü. Atangji, sobaliba anogo nungbo lesson magitsü ta masü saka sobaliba sentong ka külemi asütsüa akok mesüra pei pei class nung asütsüa akok, mapang ka agiteta agirbo ano akhi ama class agitsüla. Sobaliba süoshi agir arua pei class takdang nung kaketshir ajak pei kin sobaliba süoshi agir mena lia, parnok den shisalemsatepa lesson sayutsübaji jangratemtsüka aser tereprangtsü nunga kanga tajung asütsü. Sobaliba meteta benshiba nung nisung ajak tajangzük angutsüsa lenmang sademsadema lapoktsü aser sobaliba metetba ajanga kija taküm, kibong aser lokti nunga yimjung yanglutettsü.