Sobaliba koba agi lokti rajang kümdaktsür, itemji melenshitsüla : Tongpang Ozüküm

Minister Tongpang Ozüküm-i Mopungchuket yimdak Alisümang liden anempong sütoktsüba mapang tangokba noksa nung angur. Mopungchuket, January 29, 2019.

Mopungchuket, Jan 29 (TYO): Sobaliba koba agi lokti rajang kümdaktsür itemji melenshitsüla aser koba ajanga asenok nem tajangzük agütsür itemji benshidi, ta Nagaland PWD Minister, Tongpang Ozüküm-i Mopungchuket yimdak alisümang liden anempong sütok sentong ka nung jembidang metetdaktsü.
Tetsü-tebou otsü kisüng jembiba agi alima tejakleni maotsü, anungji, tensa den apet sobalibatem melenshitsüla, ta pai ashi. “Sobaliba koba agi lokti rajang kümdaktsür, itemji melenshitsüla aser koba sobaliba ajanga asenok nem tajangzük agütsür itemji benshidi”, ta shisem.
Mopungchuket yim ya sobaliba metetba yim ka dang masü saka Ao lima tejakleni renloka aoba, tashi tawar aser takataiter adokba yim rongnung ka lir, yim meimba aser senso asoshi bilema inyakba yim ka lir, iba yim ya aikati nükshir, anungji, iba amaji teti lidaktsünür, ta pai Mopungchuket nunger tenüngsanga ashi.
Shirnoki Tsüngrem akhümtsübua yimsü südir, item nüburtemji yimchiyimjung aser temoatsü alir, anungji, putu tasen yimsüsürtemi Tsüngrem tsübua yimsü asütsü asoshi paisa ayongzüka liasü. Tongpang Ozüküm-isa Alisümang Shir Talen anasa süngdong ka tema yutsü.
Mopungchuket nungeri putu ka atsüngdang iba ama anempong sütok inyakyim ya inyaker külen ang iba lenmang nung jajar, ta angazüker. Iba ya par sobaliba inyakyim ka lir.