Sobaliba korang nung kangki amshiba Arunachal kin kati ashishir

Guwahati, October 22 (Agencies): Sorkar sentong ka nung State Information Commission-i kanga tongtibang nisungtem nem sobaliba korang ‘Nyishi’ nung kangki keter agütsüba atema Arunachal Pradesh nung kin tulu rongnung kati ashishia jashir.
Iba korang nung tenem ozü tebang-mechi aser tenem ozü mi keta lir, aser iba ya wazüka ayuba onük ka liasü saka küm ter tejaklen international wildlife NGO kati fibreglass agi ozü  tebangmechi yanglu.
Bodhbarnü Itanagar nung Arunachal Pradesh Information Commission (APIC)-i RTI Act küm 10 ajungba benjungmung ka ayongzüka liasü.
Iba sentong tembangba sülen tasüngnü tongti tejaoker, Central Information Commissioner, Sridhar Acharyulu-i Nyishi ka den tanga sobaliba sempettem bener state state yimtiba toktsür aoba sülen Nyishi kini ibaji ashishi.
Acharyulu indang Fibreglass tenem ozü tebangmechi keta aliba korang den ano tongtibang nisung ana korang nungji Khristan indang kangki keta lir.
Item sempetji State chief information commissioner, Joram Begi-i agüja liasü.
Iba ama sobaliba korang tim mesüi amshiba atema sobaliba tamangba yimsü ketasena benshir Nyishi kini ashishia APIC aitsüogo.
Nyishi Elite Society-i sangdong ka ajanga, “Kin ka sobaliba nung tamangba yimsü mesüra tamangba lokti indang temaitsü malitsüla, koba ajanga secular raksatsütsü,” ta ashi.
Begi-i ashiba agi, pai kangkiji mangu, mesüra ibaji memanga. “Ozü staff temi kangki temaitsüji mengui bener aru südi. Kechisa atalokogo, ibaji asa-a masü, aser onoki kar yirutsütsü atema inyakba ka masü,” ta ashi.
Arunachal Pradesh nung Khristian missionary tem memelar, saka state nung Donyi-Polo aser Rangfra ama akhi sobaliba tamangba yimsü benshirtem kanga ajema kümogo.