“Sobaliba Mongchen” ta ser kaket tasen ka sayaogo

Mokokchung, Aug 11 (TYO): Er. Kazükaba Jamiri züluba kaket tasen ka tenüng agi “Sobaliba Mongchen” August 8 nü Associate Pastor Kohima Rev. T Chuba Jamir ajanga meshiteta sayatsü.
Jangratemtsükaji tanga kaket nung maliba temenungratsü otsü tajung aika keta angutsü. Iba den ano tsüraburi inyaka toktsüba sobaliba tajung indang aika shia lir. Iba kaket nung keta alibatemji; Jangratemtsü tepela aluyimertem, Ni Ungma grouping nung, Keyi sabangba, Adokya, Kibong akümba, Arürshi-i aoba, Tzü ayokba, Tetsür ketmong aser Asür lim nungertem angutsü. Iba den ano ojang ratet kar den meimchir temang nung tenük-telentem indang shia lir.
Iba kaket ya item dokantem nung angutsü; Dimapur nung Christian Literature Centre (Church Road), Kohima nung Academic Book House (Near Old NST Station) aser Mokokchung nung Student Book Centre (Main Police Point) aser Eastern Book Depot (MTBA Complex). Iba den ano taginertemi Wb. I Kümzük den iba mobile number (8974336643/ 9436208231) nung jembitsü akok.
Er. Kazükabai taoba mapanga kaket ana zülua lir, ibaji; “Sobaliba Penzü” aser “Kisü Jensü Angazütsü Tuyuba” aser tang züluba “Sobaliba Mongchen” ya züngabo pai kaket ajak senteper asem zülua adoker.
Tanü putu liso nisungtemi yim toktsür jila balala nung bendang semer den alidang akhi tsürabur nungi benshia aruba asen sobaliba tajung aika samaa odaktsür, aji oda, item sobalibatemji wazüka aser meteta ayutsü atema kaket küma adokogo ta iba osangbener den jembidang tezüluri kaket züluba nükjidong ashi. Tsüraburi benshia aruba sobaliba tajungtemji asen mulung nung mungdaktsütsü nükjidong nung kaket tenüng “Sobaliba Mongchen” agütsü ta paisa shisem.