Sobaliba ozüngtem tezüluba nung ayutsüla

Kohima, March 22 (TYO): Nagaland State Legal Services Authority (NSLSA)-i tanü Dobashis (DBs) atema training ka agi.
Iba sentong ya Office of the Commissioner Nagaland indang DPDB Hall nung agi aser “Constitution and Customary Law, Local Laws” atema agi.
Naga nunger ozüngtemji tezüluba nung mali anungji asenoki ozüngtem bendena tezüluba nung ayutsü nüngdaker. Maneni Dobashi courts-i obendang agütsüba atema züluoka ayutsüla, ta Nagaland Commissioner, M Patton-i o jembidang ashi.
Sobaliba ozüngtem aser okadakji DBs aser Goan Burahs ket nung lir anungji DBs court nung jembibatem züluoka ayutsü atema DBs tajungtem nüngdaker, ta paisa ashi.
Nagaland nung DB kar backdoor ajanga shimoka lir aser iba atema tebilemtsü abener, kechiyong judiciary system nung backdoor ajanga shimba mali anungji iba ama inyaksangshi agientsüla, ta M Patton-isa shisem.
Gauhati High Court nung Judge aser NSLSA indang Executive Chairman, Justice N Kotiswar Singh-i ‘Constitution and Customary Law, Local Laws & Role of Dobashis’ indang onük jembidang “Nagaland nung sobaliba ozüngtemi tongtipang shilem agir anungji ibaji tanü putu den apet benshitsüla” ta ashi.
Paisa ashiba agi, Indian Constitution nung Arrla 371A ajanga Naga nunger kümzüka ayur saka nisung shingaia Constitution alema inyaktsü makok.
Sentong nung Delhi high Court nung Judge Justice Sanjeev Sachdeva aser Gauhati High Court nung Advocate C. T. Jamir natia o jembi.
Sentong nung Additional Advocate General, Nagaland, Kakheto Sema-i Nagaland Village and Area Council Act, 1978 aser village Council Members o Dobashis inyaksangshi metetdaktsü,