Sobaliba wazüka ayutsü atema tongtipangtibaji asen oshi lir : Limawati

Sobaliba wazüka ayutsü atema tongtipangtibaji asen oshi lir : Limawati

Ao Kaketshir Telongjem, St. Joseph’s College  28 buba Fresher’s Day nung Addl Director, IPR, Limawati Ao-i o jembiba angur.

Dimapur, September 26 (TYO) : “Asen sobaliba wazüka ayutsü atema tongtipangtibaji asen oshi lir” ta Additional Director, IPR, Limawati Ao-i ashi.
September 26, 2015 nü Molu Ki, Kohima nung Ao Kaketshir Telongjem, St. Joseph’s College Jakhama 28 buba Fresher’s Day sentong nung Limawati-i iba olen jembi.
Iba sentong nung tongti o jembir Limawati-i ashiba agi, “Sobaliba nung sobusolemtsü, tetsü-tebou ken aser yartsüngsangtem dang masü saka chiyungtsü, tangar dang jayajako, tantsü-tambutem akhümtsübuba aser ano aika densema lir.”
“Ajisüaka, ajak dang tongtipangtibaji oshi lir kechiyong ajakji oshi dak sendaktepa lir. Asen sobaliba wazüka yudi süra asenoki asen oshi wazüka ayutsüla” ta tongti o jembiri kaketshirtem ayongzük.
Pei sobaliba wazüka ayutsü atema pei tetsü oshi jembitsüla aser asen lima tejakleni odaktsünüra, pei oshi jembitsü aser angazüktsü merangtsüla, kechiyong lokti renloka aoba nung oshi ajanga shilem tulu agir, ta paisa kaketshirtem dang ashi.
Kaketshirtemi pei tetsü oshi mesendoktsüla aser pei oshi metetba ajanga taküm nung tajangzük bener arutsütsü, ta Limawati-isa shisem
Tanü sentong nung AKT, St. Josephs College Jakhama, tir Aolemba Pongen-i Aor kaketshir tasentem pela agizük aser HSSLC tatidang nung takok anguba atema tenüngsang agütsü.
Sentong nung kaketshir tasentem tenüng nung Imsujungla-i o jembi, Deacon, KABA, Imkong Ozuküm-i temoatsü meshia sarasadem aser AKT, St. Josephs College Jakhama tongti tezülur, Imnasenla-i anküp tepela o jembi.

You must be logged in to post a comment Login