Sobaliba ya onsara tongtipang – Kibong dak sendakba nüngja kar

– Er. C. Kazükaba Jamir, Dimapur.

(Er. C. Kazükaba Jamir-i züluba Sobaliba Mongchen Kaket tapu-4 nungi agiteta adoktsür)
1. Anü, tsünglu, mopung aser yipru nungi jenokdak, ano arem shiruru, tsükchir nungi kümzüka anisüngzükdak yangluba dang ki ta ajar. Ibaibo nisungi yangluteter.
2. Tsürabur aser tanur külemi temeim ka kübok sentong yanglua, kati ka akümtsübutepa aliba dang kibong ta ajar. Ibaibo temeim aser akümtsübutep agi dang yangluteter.
3. Kibong nung tetsü aser tebu dang tsürabur ta ajar
4. Kinungtsü aser kinungpu na senteper apuani/kirep ta ajar.
5. Tebu nungi mezüngbuba jala jabaso jakzükba dang chirnur ta ajar aser par jala jabaso nungi jakzükba dang semchi semnur ta ajar.
6. Sojasor, taka taiter aser kika süchir nungi jakzükba jabaso dang nangpong ta ajar.
7. Tebu ka nungi jakzükba jalatem agir tsüngda nung tezüba ta jateper.
8. Aiür mesüra asangur shirnok mapang shitak nung kibong mekümteti menua adoker parnok dang mongren ta ajar.
9. Kibong nung kodang tanur ano nübu mejungi lidir par kibong dang kibong lanu mesüra chibang nubang kibong ta ajar.
10. Kibong ka nungi jakzükba tanurtem, tsüngtsük longtsüker, mata mabenser aser sowa solemer kodang sotetdir iba dangji Lempu Mazük kibong ta ajar.
11. Kibong nung tanur aika soteta külemi aliba dangji Nübener kibong ta ajar.
12. Kibong nung nisung ka mesüra ana dang lira, iba dangji Kijalir kibong ta ajar.
13. Tetsür ka tebok nung tanur bena lira, iba dangji Mashisa mapang ta ajar.
14. Tetsür kati tanur ana külemi (twins) sora, iba dangji Jakrepchir ta ajar.
15. Kodang kinungpu süadokdir pa kinungtsü dangji Amitsür ta ajar.
16. Kodang kinungtsü süadokdir la kinungpu dangji Sangremer ta ajar.
17. Amitsür aser Sangremer dangji Kijunglur kibong ta ajar.
18. Tetsür shibai kümshi tanur sodir la dangji Nuna ta ajar, aser kodang küm ana mesüra asem nung ka dang sodir la dang Nushi ta ajar.
19. Kinungtsü sür külen kinungpui tetsür tanaben agiba dang Rabitsür ta ajar aser la kinungpu dangji Rabir ta ajar.
20. Tanur mesoteti tetsü süadokra, iba dangji Nura agi asü ta ajar.
21. Kibong mekümjongi raksarapong ajanga tetsür shibai tanur sodir, iba tanur dangji Asangchi ta ajar.
22. Mashisa yutsür kinungpu süadokra kinungtsüi asoba tanur dangji Yangru memoar ta ajar.
23. Taküm tepiyong kibur tenzüka mapa inyakdaktsütsü asoshi alizüka ayuba nisung dang Alar/Alatsür ta ajar.
24. Taa agüja kibur tenzüka aliba dang Kilir ta ajar.
25. Kinungtsü o kinungpu na meliteti piladokra, parnok dangji Bala Lular kibong ta ajar.
26. Kodang kibongji sen, tsük aser tanga oset tsüset aika kadir Takar kibong ta ajar, aser kodang itemji mekalir Sensaker kibong ta ajar. Ano kodang onsara sensaka kümdir iba kibong dangji Mishi Mejung kibong ta ajar.
27. Kodang kasa kidong ana lembudir (Jamir o Jamitsür na/Pongener o Pongentsür na etc) iba dangji lar lapong alir ta ajar.
28. Nisung ka sor masü tashi alima nung aliba dang Akümlir ta ajar aser akümlir ajak dang Meimchir ta ajar.

Kaket Ayokdak:-
1. Christian Literature Centre 4. Students Book Centre
Dimapur. Main Police Point, Mokokchung
2. Christian Literature Centre 5. Eastern Book Depot
Chumukedima MTABA Basement, Mokokchung.
3. Academic Book House
Near Old NST Station, Kohima.