Sobaliba yimya nung mi apuba tetoktepba nung Litsasa-i takok angu

Kohima, Luchii/December 03 (TYO): 19buba Hornbill Festival dak sendakba nung December 3, 2018 nü Kisama nung Department of Youth Resources & Sports aser Tourism department nati senteper ayongzüka Naga nunger sobaliba yimya nung mi apuba tetoktepba ka agiogo, aser iba tetoktepba nung shilem agir nisung 12 nungi Sangtam kin nungi Litsase Sangtam-i takok angu, ta tanü ketdangsertem osang ka ajanga metetdaktsü.
Naga nunger sobaliba yimya nung mi apuba tetoktepba ya kümshia YRS department-i ayongzüker aser Tourism department-i nungiter.
Iba ya lisopur asaya ka lir, aser iba ya Naga nunger kin ajak, talisa teburtemi benshia arur.
Kin balala nungi nisung 12-i iba tetoktepba nung shilem agia Litsase Sangtam-i mezüngbuba jenjang nung takok ngua senpet 7000 agutsü aser tanabuba jenjang nung takok angur Chakhesang nunger Lhoupe Tepfo nem senpet 5000 agutsü.
Iba tetoktepba atema mapang telatet ka dang liasü, ibayongji tasembuba jenjang angur maliasü. SDO (Civil), Jakhama, Alemyapang-i takok angurtem nem senpet lemja liasü.