Sobalibaji oshi dak tera yanga lir:IPR Director

Dimapur, January 12 (TYO) : January 11, 2017 nü Sungratsu nung 41buba Asetkong Kaketshir Telongjem Mungdang (AKTM) tananü sentong nung jembidang tetüshi tejaoker, Information & Public Relations (IPR) Director Limawati Longchar-i, “Sobalibaji oshi dak tera yanga lir, ta ashi.
Pai, lipok otsü aser sobaliba kentem kija mesamadaktsüi ayuba dang sobaliba wazüka ayuba ta meshitet, ajisüaka asenoki anogo shia jembiba yimya, libaliro, tantsü tambu nem akhümtsü agütsüba aser asenoki inyakba ajak nung tatettsü meli inyaktetba tem dena lir, ta ashi.
Limawati Longchar-i, asenoki asen sobaliba wazüka ayutsü merangdang tanga ozüngtema akümtsübua itemji meraksatsü merangtsüla. Asen tamangba yimsü den meputepba yimsütembo asenoki anenatoktsüla, ta ashi.
Iba sentong nung jila aser yim balala nungi kaketshir teloktem nem sobaliba osettem sempet agütsü aser sobaliba dak ajemdaker quiz tetoktepba agia liasü.