Social media ajanga tain lunglung pur mashileni anir

Washington, Oct. 4 (Agencies): Tamalenbo lanurtem pei meimteper den ajuruteptsü asoshi kanga akseta liasü, ajisüaka tangbo online ajanga nisung kati aika den khen nung meimteper amai (flirt) sensaksemteter, ta Brihostibar nü bushisüngdang ka ajanga ngutetogo.
Smartphone nung aliba keyboard nung anem shia temeim nemoktsür amai kümogo, ta Pew Research Center ajanga metetdaktsü.
US nung aliba tain lunglung temi social media nung ‘like’ aser ‘friend’ nung nema metetepa akümer mesüra tera sapuba nisung den internet ajanga sensak sema metettepa akümer, ta bushisüngdangertemi ashi.
Tesüiba mapang ama tanü asünga karibo ajurutepa asüngdanger ang medemtsü tenzüker saka technology ajanga tebilemba kanga tashi ita aser nüma tanga lemsatepteter,” ta parnoki ashi.
Arishi küm 13 nungi 17 tsüngda alirtem den bushisüngdangba mapang noklang nung shilem 35 ang chijiba meimtepa medemer liasü aser tanüngbajibo mapang entoka flirt asürtem liasü.
Pew-i ngutetba agi, noklang nung shilem 31-ibo memeimer ser nung meimer ama message yokertem lir, shilem ter-i noksa yoker aser shilem tenet-i video yanglur yoker.
“Digital ya lanurtem asoshi flirt asütsü mesüra shitakba temeim sayutsü asoshi sabang tajung amai kümogo,” ta Pew bushisüngdang nung lennir Amanda Lenhart-i ashi.
Social media ajanga parnok den yimya masüba benshiba ajanga tetsür noklang nung shilem 35-ibo internet nung medemer kar denbo ‘unfriend’ süogo ta ashi. Tebur rongnungi parnok shilem 16-i iba kasa mera agiogo.
Iba bushisüngdang ya tain lunglung parnok 1,060 dak September 25 nungi October 9, 2014 aser February 10 nungi March 16, 2015 tashi agia liasü.