Social media ajanga temang animesüngzükdaktsür

April 09, 2016 : Facebook aser Twitter ajanga asenok peladaktsür asü ? Mepeladaktsür, ta tang bushisüngdang ka ajanga ngutetogo. Iba ya bushidangdang nisung pongu nungi nisung ka social media amshiba ajanga tali ang anibelemdaktsür ta asadangtetogo.
Arishi küm 30 teküpoktem DNA nung social media janga lir amai kechiba süra parnoki smartphone ajanga tesentaktep ayuba dak alaka tanga sensaksem mesüra olemtep mejangrar.
Joko asenoki inyakba tila tulu ajak Facebook, Snapchat aser Instagram ajanga lemsatepa reprangteper aser ibaji ajanga memeteti asenok temang tali anibelemdaktsür.
School mezüngteter aika mapa nunga tera meyangteter ta mapa agütsürtemi ashir. Item lanurtem jagi parnok den tainba den sensak mesemteter aser memetetba nisungtem den chitepa jembishinü mesüteter.
2015 küm nungi social media ajanga takoksa adokdaktsüba aika bushiteta arudar. Social media mapang telemtet makai amshiba ajanga shisa bulu, azüngmeyak aser pei sasa pei ila bilemba den amoa junga moteter. Online ajanga asenoki asen noksa balaka sayutsü meranger. Online nungbo asenok ya film nung tongti (starring) shilem agir ka mesüka lir saka shibai metet atangji nungbo asenok kanga tepetzük tia nung alitsü akok.
Online ajanga asenoki asen mim taküm otsü lemsateper aser social media nung ‘friend’ kaji, masü sür nung, kanga mulungtok tembar amai bilema pa/lai shidangbaji asenoki agitsü meranger.
Twitter ajanga jashiba kanga bulua lemsateper aser ibaji ajanga tetsür aikati joko twitter mamshir.
1960 küm San Francisco nung tentetba telok (hipsters)-i ‘digital-free’ inyakyim tenzükogo. Ibai mera tajung ka lir.
Mongintemi ashiba agi ayipba takdang nung screen kecha mayutsü aser nisung memejangsep tashi social media mamshitsüla, ta Arianna Huffington-i tawa züluba kaket ka ‘The Sleep Revolution’ nung shia lir.
Tesem ka nungbosa nisung ka mesüra katibosa noksa, message mesüra social media nung denang ta teti online ajanga lemsatepdar. Item yagi lanurtem ayip majanger aser telemtetba tajung magiteter.
Anungji social media nung mapang tali entokba ajanga temesepba mozü tamajung achirtem mesüka temang nung timtem tulu adokdaktsür.