Social Media amshiyim

Alima ya yimtsüng tila ka ama dang akümtsü, ta jembia aruba tu tanübo asangsang nung atalokogo. Meimchirtem mapa temelaba akümtsü aser maparen ajunga nung mapang kanga kümzüktsü asoshi computer, phone aser internet  ama apiteta yangluogo. Atangji tamshi-shia amshirtem atemabo mapang kanga kümzüker, ajisüaka ano külenbo nisung aika atema, talisa lanurtem atemabo mapang kümzüker masü, saka mapang tali intokba ka dang kümdaktsüogo. Science & Technology ajanga asenok nem agütsüba sempet tajungtiba rongnung social media ya ka asütsü. Computer aser phone amshia social media ajanga alima kinük ka nungi ka tashi second ka tsüngda osangtsüsang, noksa aser video lemsateptetba den külemi tejak o tejak na chitepa jembiteter. Internet amshirtem rongnung nisung timbakati social media site tem nung mapang timba intoker. Social media- Facebook, Twitter, Skype, LinkedIn, MySpace aser Whatsapp amshiba ajanga medemer, kinünger aser lanuwa pur medemertem den tongtepratepteter, nisung tasen den tejak nguyutepa medemer akümer aser karbo kibong-a akümtsüsa metetteper, mapa angur, computer screen nung japujariteper, kibong nung tenük tasen adoka balalular aser maksü balala bener arutsüba tatalokbatem asen lima nunga atalokba osang lir. August 24, 2015 nü Delhi tsür ka tenüng agi Jasleen Kaur-i Facebook nung noksa den osang ka  post asüba tang tashi social media nung ilongtepdagi. Lai la Facebook post nung Royal Enfield motorbike anir tebur ka noksa inokja, pai lokti alidak yimjak nung la maksüja mesüshi aser amokmerenogo ta lemsatepa sülen minute ishika tsüngda iba osangji ajaklen prokshia tebursang dangji ‘tashiyim amshia tetsür raksatsütsüpur’, ‘mayakoya nisung’ ta tenüng tamajung aika jalokja aitsü. Delhi Chief Minister Arvind Kejriwal aser actress Sonakshi Sinha nati-a khen junga mebilemdagi social media ajanga tebursangji aitsüogo, aser tesülen Sonakshi-ibo tebursang dangji tatok meshitsüsa aküm. Tatalokba tejangja memeteti linük ajungai tetsürlaji pusema tebursangji kanga mejungi aitsü aser tebursangji police-i apu. Sarvjeet Singh bail nung chiok aser paibo tatalokbaji khenyongi balaka ashiba sülen mezüng Jasleen pusemertem jenti Singh pusemertem aküm. Tesülen tenük kuli alir ka tenüng agi Vishwajeet-i kuli agütsüba den la noksa kuli ajanga Singh medenogo, ajisüaka alima tsüngdangbo tetsürla jagi pa tenüng kanga mejungi menüktsüogo. Social media nung osang tapu meyi ter adoktsü, ajisüaka junga shisadangtsü kanga nüngdak. Khen nung amangba agi takoksa jenti ajuruba lir. Tawa Delhi nung atalokba social media nung alima ajaklen prokshiba ya ajanga taküm March 5 nü Dimapur nung atalokba noksatem India nung dang masü saka alima ayimsünga prokshiba sülen linük balala nungi bendanger aikati sashia aitsüba yimdangi arua bilemeteter. Social media nung asenok kanga puadaktsütsü asoshi temesüzükba osang balala adoker, aser meshisadangeribo takoksa ajurur. Asen lima nunga social media ajanga nisung kar tenüng menüktsüba aser amokmerenba sülen osangkaket nung tatok meshitsüsa akümba, bendanger den metetteper aser parnoki foundation tenüng kar amshia nü dangi sen jenti yoktsü, anungji iba account nung sen inokjang ta shir tesülenbo ashiokdaktsüba, oset ayoktsü-alitsü jembiteper ashiokdaktsüba, profile nung pei noksa tai amshia mesüzükdaktsür tesem ka nung ajurua tebur nem ashiokdaktsüba ama tatalokba aika lir. Social media ajanga na ajangzüktsü mesüra takoksa ajurutsüji nai amshiba dak dang keta lir. Computer, phone aser internet ajanga mapang kanga kümzüker, ajisüaka tanü asüng lanurtem aika aonung piyong pokpo ama amoi moi amshitepba ajanga mapang jenti amajok nung laludaktsür. Asen lima nung arishi küm 40 ser temapur aikati social media mamshir saka arishi küm 12 tema nungi lanur aikati amshir. Chirnurtem aika kidang tsürabur mapa nung yarisemtsü mesüra lesson bushitsü melena Facebook aser online games asayaba nung mapang ajak lalur. Tanübo kibong aika nung tsüraburtem aser chirnurtem chiyungba langbang ka nung külemi mener chiyungba, kibok tekülem agiba mesüra sensaksemba mangutsü. Tsüraburtem atema chinürtem ya rongsen ta nai züngshira ner jala-jabasotemi social media amshibayim nai mita alitsüla. Tanü asüng tanurtem yabo khenyongi balaka, anungji tan putu nungbo ‘Khuret abenba tsürabur tetemjen ka’ ta züngshitsü asoshi tsüraburtemia alima ainba den liromedema angazüktsü kanga nüngdaka kümogo.