Social media tim mesüi amshiba sorkari reprangtsü: IT minister

New Delhi, October 14 (Agencies): Bodhbar nü Centre sorkari, tamangba lokti balala tsüngda tesünep raksatsüsa aser linük security raksatsüsa social media amshiba nokdangtsü atema meratem agitsü, ta metetdaktsüogo.
Bodhbar nü social media dak sentakba tasüngdangba ka langzüdang Communications & IT Minister, Ravi Shankar Prasad-i, “Tali bilemloka inyakba mesüra, tamangba yimsü mesüra kiralongrar pusemba tangatetba dak sentakba nung Home ministry aser ozü ministry tsüngda amalitepa inyaker,” ta ashi.
Osang ajanga ashiba agi, kobi melii Twitter aser Facebook ama social media nung ashishitsüsa aliba tesempatep adoktsüsa osang prokba, talisa tamangba lokti tsüngda tesempa otem intoktsü, kechiyong iba atemaji sorkari sorkartem senden ka ayongtsü sentong lir.
2013 küm Uttar Pradesh, Muzaffarnagar nung tamanger lokti ana tsüngda rara tulu adokbaji social media nung tesempa o prokba ajanga lir, ta security agency temi shiogo.
Social media ajanga olulu prokba ajanga tamangba lokti tsüngda tensa mejungi kümdaktsü.
Ano 2012 küm nunga social media nung tesempa olulu prokba ajanga Bangalore aser anasa aliba yimtitem nungi Northeast nüburtem jenti south India toktsür pei state bushia liasü.