Social Sciences kaketshirtem atema Research Methodology workshop agir

Dimapur, March 14 (TYO) : March 14, 2016 nü Social Sciences nung Ph.D kaketshirtem atema anogo ter nü Research Methodology indang workshop tenzükogo.
Iba workshop ya Nagaland University, Kohima Campus, Meriema nung agir aser tanü sentong nung tongti tesemdangerji Pro-Vice Chancellor, Prof. Pardeshi Lal liasü aser tetushi süa jaokerji Pro. Vice Chancellor, Prof. A. Lanu Ao liasü.
Iba sentong ya ICSSR special component plan kübok ST category atema ayongzüka agir aser Nagaland den temeket aliba state tem nungi ST category kaketshir dak rangloker agir.
2009 nungi tenzükba training sentong agitetba atema kanga pelar ta Pro-Vice Chancellor, Prof. Pardeshi Lal-i tongti tesemdanger o jembidang ashi.
Terenlok atema research ji kanga tongtipang saka ano mekümdangra nuclear energy ama research ajanga tamajung bener arutsür, ta Prof. Lal-isa ashi.
Sentong nung Course Director, Department of Commerce, NU, Dr. Ratan Kaurinta-i o jembidang, Research Scholars ajangzükdaktsütsü atema Research Methodology indang workshop agitsü tenzük, ta ashi.
Iba workshop ya Indian Council of Social Science Research (ICSSR)-i teyari agüja Department of Commerce NU, Meriema campus ajanga ayongzük. Sentong nung Dr. N. Martina Solo-i tesentepertem pela agizük, Prof. A.K. Mishra-i o tatsüka jembi, Department of Commerce kaketshirtemi ken ka aten aser Course Co-Director, Dr. Amrendra Kumar-i anküp tepela o jembi.