Sohan khasetdak Drishti Rajkhowa liasü

Shillong, Tsüklai 26 (Agencies): Meghalaya nung GNLA tanishir Sohan D Shira khasetba sülen ghonda ishika dang lir Sohan khasetba tesem nung ULFA tanishir Drishti Rajkhowa aliba tsüngsü bushitetogo ta osang metetdaktsü.
Sohan den khatepba mapang Rajkhowa pa den liasü, ajisüaka Rajkhowa ji jena ao mesüra yirur alitsü akok ta osang ka ajanga ashi.
Küptoknü Meghalaya police-i East Garo Hills district kübok Dobu Anchengbok tesem nung Sohan D Shira khaset.
Iba tesem nung Sohan, ULFA tanishir Drishti Rajkhowa aser tangartem lir ta osang tejangja ka angazük aser iba nung ajemdaker police-i bushitepa aodang Sohan khaset. Tang tashi iba tesem nung mapa inyakdar, ta osang ajangsa metetdaktsü.
Iba tatalokba nung Meghalaya Police ka dena asü ta jembir saka iba atemaji police-i ano kuli magütsüi lir.
Rajkhowa-i GNLA telungpurtem den külemi mapa inyaka aru. ULFA-i Garo Hills nung GNLA telungpur nem prangpong-injang agütsüba den training agütsür, ta taoba mapang-a police-i osang metetdakja liasü.
Tawa tu telungpur ka BSF tsüngdang temai adok aser pai ashiba agi GNLA telok ana senzüdar aser telok ka Sohan aser ka Rajkhowa na lenisüba lir.