Soil & Water Conservation Department-i S.K. Hekshe den tepila sentong agi

Soil & Water Conservation Department indang Director menden nungi anisüngzükdang S.K. Hekshe den tepila sentong agidang tangokba noksa ka yangi angur.

Dimapur, Rongjui/Sept. 30 (TYO): Soil & Water Conservation Department nung Director menden nungi anisüngzüksang S.K. Hekshe den tepila sentong ka department indang Conference Hall, Kohima nung September 30, 2023 nü agia liasü.

Iba sentong nung menden A.S. Hovuto, Project Director liasü aser Khriesatuonuo, Registrar ajanga director menden yutsüsang otsü tatsüka lemsatepa pa lenisüba kübok takok balala ngutetba indang osang agüja liasü.

Iba sentong Commissioner and Secretary, Soil & Water Conservation, K. Libanthung Lotha, IAS-i moaja jembidang director menden yutsüsang nem tenüngsang agütsü aser pa ya tongmelang, ajemalur, nendaka inyakba takum ka lir, ta ashi.

Additional Director, L. Chubaonen-i iba sentong nung jembidang, S.K. Hekshe yagi tensa ajak kanga junga ketdang süteter aser mapa kanga junga inyakteter nisung ka lir, ta ashi.

S.K. Hekshe-i tepila o jembidang Department indang ketdangsür aser staff temi amalitepba aser bendanga agütsür inyakba atema pelaba lemsatepa liasü.

Department nungi ketdangsür balalai iba sentong nung tepila o jembi aser tenüngsang agüja liasü.

Sentong tembanga melepzüng o Litemo Murry, Joint Director ajanga jembi aser sentong temer chiyongba mapang liasü.