SOJA SOTETSANG WAPONG TEMJEN IMNA ALONG LONGKUMER

– Mrs.R.Mapukala Pongen Rtd Teacher
Chuchuyimlang ( Merangmen Tzurangkong)

Alima ajak azüa yatartem nung Longja petinu ka atoka aya medem,
Japu yim nungi Asur Imnasashi aser Temsunaru na jabaso,
Tenem tebong ama kenyongi tetemsu tarak maket ochirshir tabensa lanur,
Wapang Temjen Imna Along Longkumer soja sotettsuogo ni…..,
Alongtaki constituency nungi tetemjen lenir mapang tetemsü nung metsü ozü-i metangokja ken aten ama,
Ya pongmang asu asangsang ta shisadang nung, atangji asua na!
Lipokdang teyangluri nu sempet palaka yangluogo.
Molulisem ama mezüngdangtet na ajungba.

Lensanir merataket wapong alima sanen,
Yimrong nung nu shisatsü nubor-i ngugo,
Sensaker, leni maortem-ia nasa tapayuba liasu,
Yimsusurtem-ia nu tsungdangbo meyazür tsungchiba inyakogo.,
Anu,Ita,Petinu meden nu shisatsui ozü tamang tia sangwatsüogo ni…,
Mopung tanepi nü tenung asangdang chubar yimli kübok, nuburtem benjongteper,
Ochi nung na taka tait, nukmeremi na mesapur, ampangyimibo mesaklok,
Nai tulusang Tsüngrem peladaktsü nung, pa nungi na temoatsu nguogo….,

Aya-a-a Angadangarni, tangaribo nungsenbangsen o jendi jembi,
Saka naibo shinga majung mangu. Nu tsungdangbo ajak tajung liasu.
Naibo nubor asoshi meinyaktettsu mapa aika indang mejembi,
Temokok agi ali nung apudaker, kodaker teyanglusang akumtsubua sayudang,
Meyisa-meyi atenshia alirtem tenuk nungi nuktsu anet,
Nu shisatsu tsuim ama tarok, nu tasu tait o agi nubor molung ateta atsung,
Sungti sunglak nung kongrochi naru apong ama, meimchir asoshi na tatishitsu tajung,
Arem subong tezü tajung aten ama shisang-shisanga aliba tasu tait ochi takum,
Piyong tenem nung anu atoker ama nu anepalu tanganutsu ola asü.
Oh! Japu Senso Sanger! Ajemaluangni……., Tsungremi nür lima semdangogo….
NAZARIT nungia langka tajung atoktsü asu ta nubori pilem,
Saka meimchir tepilemba amajok liasu, Ibaibo teyanglur sentong dang,
Anung kubok meimchir shingaia paitoktsu makok. Pai ludaktsur pai ajungkettsur,
Tiatsuba anugo, Teyanglur Tsungremi shimtettsüba mapang nuri tenjiogo ni,….
Sensosanger ajak tepela nuktzü yim-ang, ola atoka Tsungremi ajungba indang shiang,
Yimtisanger-ia metozüktetba takok konang nur madak lir

Oh! 30th Alongtaki Sangertem! Asen asoshia anu tasen ka atokogo…pelatepang,
Bendang ternungi atenshia watitepdak mongchen,
Aruli-oli…. Penzü yimkong KANAN lima mesük. Kongro sangpang tajung sotetdak,
Kong tzütalang len nungjang petinu rongnung züngsemtsusa yimsüsür tsungtet,
Pelatepang! ……. Ya Tsüngrem temoatsü asen kilongi bentsür aruogo….
Yimputir nungi mamayanger kinu tashi tepela nüktzü yimangni….
Nüktzü yima prok, tepela nung ru-ogo….
Takokji meimchir merangyong masuako, Tenyanglur maongka.

Oh! wapong tajung! tesensen ni…. Nu sentong ajak Tsüngrem ket nung yujang,
Takok aser tenungsang mapang ajemalua kumang,
Asangur YOSEB ama aika madak ketdangsur na kumdakjangma,
Nur nubor tulu, tila, tependang, takoktsu o tang jembiang,
Aika nangzüker meinyaktetra tarutsu nung nubori tamang makatsü,
Ajemalur num…ang alima senmang amangdaktsür Tsungrem O-i ashir,
Ni tenzükdaktsutsu masu, tenzüktsu alimai aru, Yisu-i ashi,
Talangka lidakjang, junga yimsusudakjang, temoatsü agujang.
Ozü lenir TEMJEN IMNA ALONG LONGKUMER.