Soli & Water Conservation Dept. World Environment Day among

Dimapur, Aami 07 (TYO): Alima ajunga den külemi Soil & Water Conservation Department-ia UN omen “Beat Plastic Pollution” nung ajemdaker Directorate nung aliba Conference Hall nung World Environment Day mungogo.
Iba anogo ya ‘green social responsibility’ nung tekümdangtsü tesayuba agütsütsü aser tang nüburtemi plastic amshiba asoshi teshisadangba lia iba melena tanga oset amshitsü nükjidong nung ayongzüka among.
Iba sentong nung jembiba mapang, India-i alima ajunga nung World Environment Day 2018 ya ayong, koba UN Environment ajanga alima ajunga asoshi ayongzükba sentong ka lir aser khen amshiba plastic ajanga tzü mopung menentsüba samatsü asoshi tezüngzüktep agitsü nükjidong nung tenzükba sentong ka lir, ta Project Director, Shri. Zhekheto Awomi-i ashi.
Plastic ajanga tzü mopung menentsüba ya India aser Nagaland nunga wara ka ama kümogo, ta pai ashi.
“Asenoki tanaben mamshitetra magizüktsüla,” ta pai ajungshia ashi. Paisa iba sentong nung adenertem dang plastic ajanga tzü mopung menentsüba koktettsü asoshi tasa kar lemsatep. Pai ashiba agi, shisa-a maoba (non-disposable) plastic mamshitsüla, khen dang amshiba packaging tem magizütsüla, tanaben amshitetba yangko tem shimteta amshitsüla aser office-i süngo ajemba mug bener arutsüla.
Kasa sentong nung National Adaptation Fund on Climate Change kübok Joint Director, K. Khekiho Shohe-i “Gene Pool Conservation Project” indang power point presentation agütsü. Pai iba mapang asen aliba tesem nung amshiba yimyatem melentepa tzü mopung wazüka ayutsü ajungshi.
Deputy Director, Rongsenlemzung-i iba sentong ketdangsüa agiba mapang plastic tajemba nung amshitsü ayongzük.
Kasa anogo Project Director, Zhekheto Awomi-i anir Directorate telongzük nung tebur jungdaktsüba süngtongtem atem. Iba anogo ya state nung aliba department headquarter 23 nung munga liasü.